Human sa malampuson nga pagpahigayon sa unang edisyon, gilusad na usab sa mga nagpasiugda ang ikaduhang hut-ong sa Heroes Adventure Virtual Challenge nga gikatakda karong Septiyembre 10 ngadto sa Oktubre 10, 2021.
Sa nasayran nga ang unang edisyon nga giulohan og "Hope of the Nation, nagmalampuson human nga ang mga organizers nakakolekta og igong pundo sa maong kalihukan nga gitumong alang sa scholarships program niadtong mga bata nga nailo na sa mga ginikanan nga naapektohan sa kasungian tali sa gobiyerno ug sa armadong rebelde sa lungsod sa Guihulngan, Negros Oriental.
Sa Zoom press conference diin sa samang higayon naglusad usab sa ikaduhang edisyon nga gipahigayon sa Lunes, Agusto 16, 2021 sa Bikes and Brews, ang chief organizer nga si Tere Conson, mibutyag nga miabot ogs P50,000 nga salapi ang nadonar ngadto sa mga benepisaryo nga gipaagi sa local government unit sa nahisgutang lungsod.
Matod ni Conson nga gikalipay sa ilang grupo ang pagdonar sa maong kantidad nga dako na kaayo og ikatabang sa mga bata nga maggiya unya kanila sa maayong kaugmaon.
Ang 3rd Civil Relations Group of the Armed Forces of the Philippines (AFP) nga maoy kaabag ning maong programa ang nakigduyog usab sa Active Hub Fitness Center sa pag-turn over sa maong kantidad ngadto sa buhatan sa City Social Welfare and Development.
Subay niini, target sa second leg mao na usab ang mga personnel sa AFP nga nangaangol sa ilang pagpakigkombati sa mga rebelde.
Kini giisip nga usa usab sa mga programa nga ipahigayon atol sa selebrasyon sa "National Heroes Day" karong Agusto 30.
Ubos sa running category, ang mga partisipante makapili sa mga distansiya nga iyang salmotan. Kini mao ang 21-k nga alang sa mga starter, 50-km (intermediate), 100-km (advance) ug 180-km. sa Elite.
Sa biking, aduna silay 75-km., 300-km., 700-km ug 1,200-km. samtang ang bike elevation (tungason) langkuban kini sa 1,500-meter, 4,000-meter ug 8,000-meter.
Gikonsiderar ni Conson nga ang pagpaubos sa National Capital Region (NCR) sa ECQ ug sa ubang dapit sa nasod tungod ning nagsaka nga kaso sa Covid-19 virus naghatag kanila og dakong hagit.
Apan siya malaumon nga sa gihapon daghan ang maikag nga mosalmot niini.
Sa first edition, moabot ngadto sa 500 ka individual ang misalmot.
Aron paghatag og dugang kasayon, gipahibawo ni Conson nga aduna silay ibutang nga registration site sa Gaisano Country Mall hangtod sa Agusto 24 diin dihadiha gilayon makuha ang race kit.
Mga nagkalainlaing freebies, lakip na ang finisher's medal ang maangkon sa mga partisipante. (JBM)