MAKUTI nga proseso aron maseguro nga luwas nga makasulod sa Davao City, kini ang gihimo sa awtoridad labi na sa Davao City Tourism Office sa paghidangat sa 120 ka mga Returning Overseas Filipinos (ROFs) nga onboard sa PR528 gikan sa Kuala Lumpur alas 8:27 sa gabii niadtong Lunes.
Usa-usa nga gihiling ang mga dokumento sa mga pasahero sa pag-abot sa Davao International diin sa maong ihap sa mga pasahero, 94 niini mga overseas Filipino workers (OFWs) ug 26 ang dili OFWs.
Sa mao sab nga ihap, 24 ka ROFs fully vaccinated samtang ang 17 nakadawat na sa ilang first dose sa Sinovac ug Pfizer vaccines.
Gikan sa pag-abot sa mga pasahero, ipang-swab sila sa ikapito ka adlaw ug mohimo sila og quarantine hangtud Agosto 29, diin sa pagka-ugma pa sila maka-uli sa ilang panimalay.
Gawas sa lokal nga kagamhanan sa Davao City, miabag sab ang Overseas Workers Welfare Administration (OWWA) sa pagtubag sa ilang mga quarantine facilities, swabbing ug sa biyahe sa mga OFWs.
Gipaningkamotan sab ni City Tourism Operations Office chief ug Airport Monitoring Head Generose Tecson, mahan-ay ang pagproseso sa pag-abot sa mga ROFs sa umaabot nga mga adlaw. (Jeepy P. Compio)