SAMAD-PINUSILAN ang nahiaguman sa usa ka lalaki human pusila sa giingong nagtsismis kaniya didto sa Purok 4, BarangayCamanlangan, New Bataan alas 7:15 sa gabii, Martes, Agosto 16, 2021.

Ang biktima giila nga si Artem Gambito Bitanghol, 46, mag-uuma ug molupyo sa nahisgutang dapit.

Base sa inisyal nga imbestigasyon, nasayran nga samtang ang biktima, kauban sa iyang kapuyo nga si Mely Maito Colaba, 54, nanihapon sulod sa balay sa ginikanan niini, nadungog nila ang paka sa bato nga gilabay sa atop sa balay hinungdan nga migawas ang Bitanghol ug gisusi ang balay.

Apan samtang nagsusi, kalit nga mipaka ang duha ka sunod-sunod nga buto sa pusil ug naigo ang biktima sa walang bahin sa paa ug ubos nga bahin sa tuhod.

Matud pa nga gamit ang flashlight, nakit-an sa biktima ang suspek nga ginganlan og alyas Henry nga armado sa wala matinong kalibre sa armas.

Gibutyag nga ang biktima nakahimo pa pagdagan ug nangayo'g tabang sa balay sa usa ka Roel Terante samtang ang suspek nagdaling mikagiw paingon sa wala masayring direksiyon.

Nasayran sa gihimong imbestigasyon nga niadtong Agosto 7, 2021, ang biktima ug ang suspek wa nagkasinabtanay human matud pa nagpalakaw og tsismis ang suspek nga ang biktima dunay relasyon sa anak sa iyang kapuyo.

Ang biktima gidala sa Davao De Oro Provincial Hospital pinaagi sa mga miresponding sakop sa New Bataan Emergency Action Team aron matambalan.