NAKAGAWAS sa bilanggoan human makapyansa pasado alas 3 sa hapon sa Huwebes, Agusto 19, 2021, ang food delivery driver nga gikalalis sa traffic enforcer sa lungsod sa Consolacion.
Apan ang babayeng traffic enforcer nga nipapriso kaniya sa kasong disobedience of person in authority gisuspenso sa mayor sa lungsod sa Consolacion og 15 ka adlaw nga way sweldo sugod sa Huwebes, Agusto 19, 2021.
Si manlalaban Juril Patiño maoy naninguha nga makagawas si Marcelino Sabucido, 23, pinaagi sa pagduaw sa police station ug pagtawag sa assistant prosecutor nga naghupot sa kaso.
Base sa iyang Facebook Live, nagdala si Patiño og P10,000, tipik niini nga P3,000 gipyansa sa kaso samtang ang nahabilin giabag sa pamilya ni Sabucido.
Gidonar kini sa usa ka mayor.
Si Feliculo Leciones, pangu sa Consolacion Traffic Enforcement Service nga nahinabi sa Superbalita Cebu sa Huwebes, niingon nga si Mayor Joannes Pepito Alegado nisuspenso og 15 ka adlaw kang Maricris Vallejos, 40.
Si Leciones niingon nga dunay “lapses” si Vallejos sa iyang gibuhat bisan kon nagpatuman sa balaud sa trapiko.
Matod niya nga bisan bug-at ang 15 ka adlaw nga pagsuspenso, apan gikinahanglan kining ipahamtang aron makita sa publiko nga way gipalabi sa balaud ang lokal nga kagamhanan.
Apan matod ni Leciones nga di angay nga hukman dayon si Vallejos kay kadto pa lang nahitabo nga duna kini gikalalis ug nag-init ang ulo.
“Di sab unta dayon mo judge tang tawo. Wa ta kahibawo unsay problema sa ilaha mao na ingon siya ato,” matod ni Leciones.
Gawas sa pagsuspenso kang Vallejos, hayan pamultahon pa siya sa mayor human makita ni Alegado nga gipaubos sa enforcer ang iyang facemask atol sa panaglalis.
Matod ni Leciones nga isip usa ka doktor, si Alegado estrikto kaayo sa pagpatuman sa mga health protocol, apil na ang kanunay nga pagsul-ob og facemask.
Dihang gipangutana sa Superbalita Cebu kon pila ang multa, matod ni Leciones nga di mominos og P1,000.
Nanghinaut usab siya nga magpinasayloay sila si Vallejos ug Sabucido aron di na modako pa og maayo ang problema “kay hasol kaayo nang kaso kaso.”
Sila si Vallejos ug Sabucido nagkalalis human giingong wa mopatuo sa pagpahunong sa mga sakyanan aron makatabok ang mga pedestrian sa atubangan sa SM Consolacion sa J. P. Rizal St., Barangay Lamac niadtong Martes, Agusto 17, 2021.
Sa video, namasangil si Sabucido nga gidapatan siya ni Vallejos nga gihimakak usab sa enforcer. (REV)