COTABATO CITY -- Luwas na sa makuyaw nga kahimtang ang duha ka mga sakop sa Philippine Marines human nga matumbahan ang ilang gisakyang Toyota Innova og punoan sa lubi alas 11 sa buntag, Huwebes, Agosto 19, didto sa Balabagan, Lanao del Sur.
Mga biktima pulos molupyo sa North Cotabato.
Sa taho sa Balabagan Municipal Police Station, nasayran nga nagdagan ang Toyota Innova didto sa Secretary Narciso Ramos Highway sa Barangay Macao sa maong lungsod ug paingon unta sa Malabang apan kalit lang natumbahan sa giputol nga punoan sa lubi.
Samdan ang drayber ug iyang kauban kinsa naipit sulod sa ilang gisakyan.
Dali sab nga gitabang ang mga biktima sa mga molupyo sa dapit nga nakakita ug gihatud ngadto sa pinakaduol nga ospital.
Sa wala pa ang insidente, dunay mga molupyo sa maong dapit nag-ingon nga ilang gisinyasan ang drayber sa sakyanan nga dili una moagi kay dunay giputol nga lubi apan imbis nga mopatuo, midiretso hinuon kini og sentro nga naigo sa pagkatumba sa lubi.