RESPONSIBILIDAD namong maglilindog ug magsisibya ang pagpaambit sa among mga hunahuna kung dunay mga isyu nga naglambigit sa bagang katawhan o katilingban, maayo o bati man.
Mao ni rason nganong nangita ko og paagi para mas makapasabot sa epekto ining makamatay nga coronavirus disease 2019 (Covid-19) kay hangtod karon daghan pa gihapong ang nangahadlok ug nagdumili sa pagpa-bakuna tungod sa mga buktot nga tinuhoan (mahimong zombie o mamatay).
Hangtod karon daghan pa gihapon ang mga nagpabadlong, waldas og lag, way suot nga face mask ug face shield, ug way klarong social distancing maong di ikahibulong nga mibalik pagsaka ang gidaghanon sa natakdan ini.
Apil ini akong higala nga si Andy (tinuod ngalan gitago) nga akong nahinabi sa telepono human siya na-admit og subra usa ka buwan sa ospital sa pagkumbati ining kagaw.
Matod niya, pait kung masakit o mamatay ka sa Covid-19 kay mismong imong kabanay o mga minahal di nimo igkita bisag sa haya kay ideretso kaman og lubong o i-cremate.
Gisaysay ni Andy ang iyang kasinatian sama sa pagsugod og labad sa ulo sa may agtang nga bahin, tumang pagpangapoy sa lawas ug kaunoran, taas nga hilanat, pagpangatol sa tutunlan, uga ug sagunson nga pag-ubo nga makahapo unya murag way kahumanan maong magsakit ang dughan, bukobuko ug baga.
Punga sab iginhawa kay bation man nga murag naay nagbara sa ilong nga murag gisap-ungan maong gitauran siya og oxygen kay ang tubo ini makalahos man taman sa tumoy sa sulod sa ilong nga sarang kunong sakita.
Unya kay wa man kini nagsilbi kay lisod man gihapon iginhawa, giabrihan ug gipaskan na sab og tubo iyang tutonlan deritso paingon sa baga (artificial respirator) unya gi-sedate siya sa doktor aron di kalihok, di ka estorya, di kakaon unya makapahuway.
Naghilak siya sa kapait ug kamingaw kay wa may pweding makaduol ug makatabang.
Kini tanan akong gisuwat di sa pagpanghandlok kundi paghangyo sa nagsunod ining lindog sa pagpabakuna og pagsunod sa gilatad nga health protocols sa mga awtoridad.