Mga duha ka semana nang nang nagsugod sa ilang trabaho sa kadalanan ang mga sakop sa Bike Patrol sa Sugbo Bike Lanes Board nga gipangulohan sa akong higala nga si Atty. Gerry Carillo. Dalaygon kaayo ang ilang gibuhat tungod kay nanggiya sila sa mga biker sa unsay angay nga buhaton aron mas luwas sila sa karsada.
Apil sa safer ride ang kanunay nga pagasubay sa bike lanes, pagsul-ob og helmet ug pagtaud og blinkers sa biseklita. Mas maayo gani kon ang helmet butangan sab og blinkers aron mas makita sa mga sakyanan samtang layo pa. Mas taas ang gibutangan sa blinker, much better, mas maayo ang visibility.
Magbutang gani og blinkers sa seatpost, kinahanglan nga naa sa mas higher nga part. Naa man guy uban nga masalipdan sa ligid. Ang purpose gud sa blinkers mao ang visibility sa gabii aron makita ka sa mga sakyanan nga nagsunod o imong kasugat.
Kon gisultihan ka sa Bike Patrollers kabahin niini, ayaw kasuko kay alang ra sab ni sa imong kaluwasan. Nalatid usab ni sa ordinansa sa Dakbayan sa Sugbo busa angay tumanon. Gipanday ang ordinansa ubos sa giya sa atoang kaubanan nga bikers. Gitun-an usab na og maayo una pa giluto ug giduso ang ordinansa.
Tuman lang gud ta kay alang ra sab ni sa atong kaluwasan.
SOBRA RA
Apan kon pasul-obon sa Board ang tanang bikers og elbow ug knee pads nasobraan ra sab kon tinuod man gani na. Kani anti-poor nga polisiya kon ipatuman man. Galisod gani og palit ang kadaghanan og maayo og klase nga helmet, unsa na kaha kon mag pads.
Gawas pa, wa man mangapil og lumba o tournament ang mga bike rider. Kadaghanan nanginabuhi samtang ang uban leisure biking ra man. Nganong hasulon pa man sa pagpasul-ob og pads? Ang mga XC riders ug roadies wa man gani mag pads sa mga lumba? Wa man gani gasul-ob ang mga nagmotor sab. Statistically, mas daghang disgrasya sa mga motorsiklo itandi sa nagbiseklita.
Hasol usab kaayo sa bikers ang mag pads. Nag helmet na gani ubos sa silaw sa adlaw, pun-an pa ang kainit sa lawas sa pagsul-ob ob og pads? Kahasol sa paghukas ani kon moabot na sa destinasyon, di ba?
Sobra ra pud kon ipamugos.
IPATUMAN
Kon unsa man ang alang sa kaluwasan sa bikers, sama sa pagpasubay kanila sa lanes, pagdakop sa mga mobabag sa agianan dako na kaayo og ikatampo sa kaluwasan.
Ipadayon lang una ang pag-edukar sa mga magbiseklita.Di una manakop sa mga makalapas kay di baya diha-diha motuhop sa alimpatakan sa tawo ang husto ug angay nga buhaton. Di usab diha-diha makapalit ang tanan og helmet ug blinkers.
Hinayhinayon ang pagpatuman sa ordinansa, apan lugwayan ang pagpangedukar sa mga magbiseklita.