Nakatala ang Poro Rural Health Unit (RHU) sa Poro, mga isla sa Camotes og 10 ka patay sa kompirmadong nataptan sa Covid-19 samtang siyam ang nangamatay nga gidudahang tungod gihapon sa samang sakit.
Matod ni Mayor Edgar Gary Rama nga nahinabi sa SunStar nga pipila niini nangamatay sa tambalanan samtang ang uban sulod sa ilang balay sanglit puno na ang Covid-bed capacity sa district hospitals.
Sigon pa ni Rama nga natala ang tulo ka mga namatay niadtong uwahing semana sa Hulyo samtang ang pito karong Agusto.
“Karong panahuna, everyday naay patay. Mga two weeks na. So, karun duha na ka adlaw way patay, basin moundang na., Ang uban dili magpadala og hospital. Ang uban magpadala kon maglisud na og ginhawa. Ang uban mada sa hospital, ang uban gibalibaran na sa hospital, gida sa Vicente Sotto pero patay gihapon,” matod ni Rama.
Sigon pa ni Rama nga nagsugod og saka ang mga kaso sa Covid-19 sa iyang lungsod karong buwana.
Samtang, nahunong usab ang pagpamakuna sa iyang lungsod human nagpositibo sa Sars-CoV-2, kagaw sa coronavirus disease 2019 (Covid-19), ang duha ka mga sakop sa RHU.
Dugang pa ni Rama nga kaniadtong Martes, gipaubos sa swab test ang close contacts sa mga nagpositibo, apan Huwebes na niabot ang resulta.
Busa nakadesisyon siya nga karung Lunes ipadayon ang pagpamakuna sa katawhan.
Samtang, gikompirmar usab ni Rama nga dunay nagpositibo nga mga empleyado sa municipal office, apan nakarekober na. Di usab siya buot ipaubos sa lockdown ang buhatan sanglit maapektuhan ang serbisyo nga ilang gihimo.
Gipasalig hinuon niya nga kanunay nga gi-disinfect ang matag opisina kada adlaw.
Samtang, buksan karong Septiyembre ang treatment and monitoring facility (TTMF) nga dunay 14 ka mga lawak.
Matod ni Rama nga nagkantidad og P4 million ang maong pasilidad.
Mao kini mao kini moatiman sa mga positibo sa Covid-19 gawas sa mga barangay isolation center.
Adunay 18 active cases sa Covid-19, 24 recoveries, 10 ang patay ug dunay kinatibuk-ang 52 kaso ang lungsod sa Poro sukad nagsugod ang pandemic sa miaging tuig.