SUPERBALITA CEBU

Kilat gibasol sa Visayas blackout

KANGITNGIT: Bugtong dan-ag sa karsada mao ang kahayag gikan sa cell phone sa usa ka lalakeng mitadlas sa Osmeña Blvd., Dakbayan sa Sugbo taliwa sa kangitngit dihang miigo ang blackout sa Sugbo ug ubang dapit sa Kabisay-an sa Biyernes, Agusto 20, 2021. (AMPER CAMPAÑA)

Niabot og tulo ngadto 12 oras ang nasinati nga blackout sa Kabisay-an nga nagsugod sa Biyernes sa gabii, Agusto 20, hangtod sa buntag sa Sabado, Agusto 21.

Ang rason sa National Grid Corporation of the Philippines (NGCP) Visayas ang kilat nga miigo sa mga transmission line nga anaa mahimutang sa Colon-Cebu ug Colon-Quiot sa Sugbo.

Ang gipasabot mao ang Barangay Colon sa dakbayan sa Naga ug Bgry. Quiot, Dakbayan sa Sugbo, nga nakaapekto sa Visayas grid.

Sa wa pa ang blackout, nagbunok ang uwan sa pipila ka bahin sa Metro Cebu nga giubanan sa panugdog ug kilat.

Ang blackout nakamugna og kabalaka ug kahadlok sa netizens human mahibaw-i ang kalapad sa blackout.

Dunay mga nag post sa social media nga way kuryente sa ilaha sa Leyte, Bohol, Samar ug Sugbo.

Nisamot ang kabalaka dihang nitumaw ang usa ka hulagway nga gaingon nga usa ka planta sa kuryente sa Dakbayan sa Naga nasunog, apan di diay tinuod.

Laing hinungdan mao ang kalangay sa NGCP sa pagpahibawo sa publiko ug mga power distributor sa hinungdan sa blackout.

KILAT DIAY?



Sa taho sa NGCP Visayas, alas 11:56 sa gabii, Agusto 20 dihang nagsugod ang blackout.

Lakip sa apektado nga dapit ang tulo ka dagkong syudad sa Sugbo, amihanang bahin sa lalawigan sa Sugbo, Leyte, Samar, ug Bohol.

Matod sa tigpamaba sa NGCP Visayas, Betty Martinez, nga naigo sa kilat ang Colon-Cebu 138kV Lines 1, 2 and 3 ug Colon-Quiot 138kV Line nga maoy nakapahunong sa dagan sa kuryente.

“Pag-trip sa Colon-Cebu ug Colon-Quiot transmission lines, nag trigger (og) partial blackout, napalong pud uban lines sa Cebu, Leyte-Samar ug Bohol,” matod ni Martinez.

Pagpasabot ni Martinez nga wala maapektohi ang habagatang parte sa lalawigan sa Sugbo tungod kay naka-supply og kuryente ang Toledo Power Plant.

Ang Visayas aduna’y interconnected grid nga nakakonektar usab sa Luzon grid.

Sa taho sa NGCP Visayas, nagsugod ang restoration o pagbalik sa kuryente alas 12:52 sa buntag Agusto 21.

Samtang labing uwahi nga nibalik ang kuryente sa Bohol alas 5:48 sa buntag sa Sabado.

“NGCP fully restores power transmission services to areas in Visayas affected by the lightning strike to NGCP’s Cebu-Quiot-Colon line. The last remaining feeder, which affected the franchise area of LEYECO V, was restored at 12:16PM today,” matod sa NGCP sa ilang official Facebook page.

Ang usa sa labing dako nga electric utility sa Visayas nga Visayan Electric Company alas 2:14 sa kaadlawon na nakasugod og pasiga samtang fully restored usab ang ilang tanang konsumidor alas 4:30 sa kaadlawon na.

Si Energy Secretary Alfonso Cusi nanawagan usab sa Energy Regulatory Commission (ERC) nga imbestigaran ang maong panghitabo.

Samtang tungod kay wala dayon mataho sa NGCP ang rason sa kalit nga halapad nga blackout, nag-trending sa social media ang usa ka hulagway ug video nga daw nasunog nga planta.

Apan giklaro dayon kini sa KEPCO SPC Power Corporation nga dili tinuod.

“This is to clarify that the posts circulating online that KEPCO SPC Power Corporation was on fire and is the cause of the blackout is not true and is fake news,” sa pamahayag sa kompaniya.

BAKUNA OKAY RA



Samtang si Dr. Jaime Bernadas, Department of Health 7 director, nisulti sa SunStar Cebu, sa Sabado sa buntag nga way bakuna nga nadaut tungod sa blackout.

“As of 10 am today, assessment in the affected areas’ vaccine storage reveals temperature ideal for vaccine storage were maintained,” matod sa opisyal nga pamahayag ni Bernadas.

Si Dr. Jeffrey Ibones sa Cebu City Health Department niingon nga dunay gigamit nga generators atol sa blackout busa ang mga bakuna wa maapektuhi.

“We have generator, the malls too have one. So vaccines were not affected,”matod ni Ibones.

Si Atty James Sayson, deputy officer sa vaccination operations center sa dakbayan sa Lapu-Lapu, niingon nga wa madaot ang mga bakuna sa dakbayan. (Dugang taho ni JJL, GCM)

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!