Binasi sa Josua 24:1-2, 15-18; Salmo 34; Taga-Efesos 5:21-32; Juan 6:60-69
Nakapamalandong ang usa ka bantugang manunulat nga ang tawo kuno nangita og kalipay apan dili usab matago ang atong abilidad nga mahimong miserable. Usahay pa gani ang tawo kuno “sa paagi nga labaw sa ordinaryo ug puno sa pagbati nahigugma sa pag-antos.” Tingali makaingon pod kita nga ang tawo ra ang mokalot sa iyang kaungalingong lubnganan.
Ang labing dako nga kahimtang nga makapadangat sa atong pagkamiserable mao ang pagbugto sa atong relasyon sa Dios. Gihisgotan sa ebanghelyo nga “lisod” ang pulong ni Jesus. Unsang mga pulonga? Sa unahan miingon si Jesus, “Kay ang akong unod tinuod nga kalan-on, ug ang akong dugo tinuod nga ilimnon.” Tungod niining mga pulonga, “daghan sa iyang mga tinun-an mingbiya ug wala na mosunod kaniya.” Gibugto nila ilang relasyon ni Jesus.
Pagkaanugon. Nataligam-an sa maong mga kanhiayng disipulo ni Jesus ang gisulti ni Jesus sa wala pa sila mobiya: “Mao kini ang pan nga mikanaog gikan sa langit, dili sama sa inyong katigulangan nga nangaon ug nangamatay. Ang mokaon niining maong pan mabuhi sa dayon.”
Miserabli kita kon dili makadawat sa “pan nga mikanaog gikan sa langit”. Taphaw atong kinabuhi kay mag-agad ra man kita sa mapakaon kanato sa kalibotan. Ug tungod kay ang kalibotan lumalabay, dili molahotay atong kabusog. Espirituhanong butang lamang ang makapabusog sa espirituhanong kagutom.
Apan ang makalibog kay naa gyoy mga tawo nga magpalayo gyod sa gugma ug kaluoy sa Dios. Mao nga matag karon ug unya kinahanglan ang katilingbanong pagsanong sa Dios aron magdinasigay kita. Mibarog si Josua ug gihagit niya ang mga Israelita: “Kon dili makapahimuot kaninyo nga mangalagad sa Ginuo, disidir karong adlawa kon kinsa ang inyong pagasilbihan...Alang kanako ug sa akong bana, pagasilbihan namo ang Ginuo.” Wala mamugos si Josua kondili gibarogan lamang niya ang iyang pagtuo. Nadani niya ang katawhan sa Israel.
Ipadayag ang pagsilbi sa Dios diha sa banay. Sa sulat ngadto sa mga taga-Efesos, giawhag ni Pablo ang mga Kristohanon nga ipadayag ang ilang pagtuo diha sa ilang relasyon sa usag-usa. Kinahanglan magpaubos ang mga asawa ngadto sa ilang mga bana. Ang mga bana, sa ilang bahin, kinahanglan higugmaon ang ilang mga asawa sama nga gihigugma ni Cristo ang simbahan.
Ang pagbinayloay og katahoran ug gugma sa usag-usa diha sa banay maoy tambal kun bakuna sa abilidad sa tawo nga mahimong miserabli. Mapugngan kini kay mahidugtong na man ang mga sakop sa banay, sugod sa magtiayon, sa gugma ug kaluoy ni Cristo. Dili na mangita og lain pang gamot ug atabay sa gugma kay ang Ginuo na mismo.
Nalupig na ba pinaagi sa gugma sa Dios ang imong abilidad nga mahimong miserabli?