Kusganong gihimakak ni Sen. Bong Go nga wala siyay kalambigitan niining controversial nga opisyal nga si Lloyd Christopher Lao.
Si Lao man gud maoy hepe sa procurement service sa Department of Budget and Management (DBM). Siya nalambigit sa kwestyonableng pagpalit og COVID-19 supplies nga moabot og P42 bilyones nga gitumbok sa Commission on Audit (COA).
Kining P42 bilyones gikan sa Department of Health (DOH) dayon gibalhin ngadto sa opisina ni Lao nga walay memorandum of agreement. Mahimo ra man unta nga ang DOH direktang mopalit og medical supplies kay suweto man sila sa maong mga palitunon. Apan kahibudngan nga gibalhin sa opisina ni Lao.
Dihang naabot na sa opisina ni Lao, gikuhaan kini aron mopalit og face mask nga tag P27.72 ang usa ug P120 ang matag usa ka face shield.
Pagguwa sa ngalan ni Lloyd Lao, nangugat dayon si Sen. Bong Go nga wala siyay suod nga kalambigitan niini. Apan nasakpang namakak ang senador kay undersecretary man kini sa opisina ni Special Assistant to the President (SAP) Bong Go niadtong naa pa sila mag-opisina sa Malakanyang.
Ug ang labing ulahing kalamboan niini kay giduphan gyud sila ni Presidente Rodrigo Duterte.
Matod pa sa Presidente, kining presyo sa face mask ug face shield maoy labing barato niadtong tungora. Ilang gipalit kay gikinahanglan man kaayo.
NAKADUNGOG
Moprangka lang ko nga nakadungog na ko niining ngalan ni Lloyd Lao sa unang mga tuig sa termino ni Presidente Duterte.
Niadtong higayona, gitukod ni kanhi Cabinet secretary Jun Evasco ang Office for Participatory Governance (OPG) ug nakuyog ko sa pipila ka higayon didto sa ilang opisina sa Malakanyang. Di lang ko mohatag og detalye sa akong nadunggan kay wala man akoy pruweba.
Apan kini si Lao, nailhan na gyud nga usa sa mga opisyal sa opisina ni Bong Go.
PACMAN
Akong gihulat karon ang kulbahinam nga sangka ni Sen. Manny Pacquiao ug Yordenis Ugas, ang WBA super welterweight champion. Adto kini mahitabo sa T-Mobile Arena sa Las Vegas karong 11:30 (Manila Time).
Si Pacquiao mosangka unta ni Errol Spence Jr. apan niatras kini kay na-injury ang iyang mata tungod sa training. Si Ugas, usa ka 35 anyos nga kampyon, maoy niilis ni Spence. (DM nako sa @anol_cebu)