Ambot kon sama sa naandan nga mga away ni Filipino boxing icon Manny Pacquiao kon mohunong ba ang nasud karong adlawa sa iyang pag-atubang sa Cuban Olympian boxer Yordenis Ugas. Giulohan ni sa GMA network nga maoy nakakuha sa exclusive airing rights ning maong away nga ‘The Legend versus The Olympian.‘ Samtang kuyaw og record si Ugas, apan morag amateur ra kon itandi sa record ni Pacquiao.
Gibunlot ra ni si Ugas human niatras ang original nga kaatbang ni Pacman nga si American boxer Errol Spence Jr., human ma-injured ang mata atol sa praktis. Kadto unta maoy nindot tan-awon kay kuyaw og record si Spence. Kon akoy promoter ani o kon akoy Manny dili ko moaway. I-postpone ug huwaton nga mamaayo ang mata ni Spence. Matsambahan pa lang hinuon si Manny.
Ania ang record ni Manny: Total fights, 71; wins, 62; wins by knockout,39; pilde 7. Natawo niadtong December 17, 1978; edad, 43. Samtang si Yordenis Ugas Hernandez, natawo sa July 14, 1986, Cuban professional boxer nga naghawid sa World Boxing Association (WBA) super welterweight title sukad sa Enero 2021. Iyang gihuptan ang WBA regular title sa 2020 hangtod nga misaka sa super champion.
Isip amateur boxer, nakasakmit siya og gold medal sa 2005 World Championships ug bronze medal sa 2008 Olympics sa lightweight division.Sa November 2020, anaa siya sa rank isip world’s fifth best active welterweight sa Transnational Boxing Rankings Board ug ika-pito sa The Ring Magazine ug BoxRec. Nickname: 54 Milagros, nationality: Cuban; height 5’9, reach 69; age; 35: Boxing record: total fights, 30; wins, 26; wins by knockout, 12; pilde, 4.
Daghan ba ang motan-aw ning awaya nga kon sa sugarol pa sa manok morag logro? Bisan ako morag nawad-an na og interest sa mga away ni Manny. Labi pa ning pag-apil-apil ni Pacman sa pulitika kay lagi intrisado nga molansar sa pagka-presidente. Siguro sila si Pres. Duterte ug Pastor Apollo Quiboloy nag-ampo nga mapilde si Pacquiao ning awaya aron makuhaan ang kasikat.
Mabati ang live coverage sa away sa DYSS Super Radyo (999 khz) ug ang delayed telecast sa GMA 7 nga maoy nakakuha sa exclusive rights ning awaya.