Dako og natabang sa vaccination program sa kagamhanan ang pag-abli sa mga pultahan sa Waterfront Airport Hotel & Casino sa siyudad sa Lapu-Lapu ug Waterfront Cebu City Hotel & Casino sa Lahug, hinungdan nga mas daghan pa nga mga molupyo ang nabakunahan.
Sukad sa Hulyo 21 hangtod sa Agusto 17, niabot na og 14,782 ka mga molupyo sa dakbayan sa Lapu-Lapu ang nabakunahan na sa pacilidad sa maong hotel.
Samtang 3,693 usab ka mga tawo ang nabakunahan na sa samang hotel sa siyudad sa Sugbo .
Libre ang mga bakuna.
Sa pag-abli pa lang sa site niadtong Hulyo 21 hangtod sa Hulyo 30, aduna nay kinatibuk-an 5,108 ka mga residente sa Lapu-Lapu City ang nabakunahan.
Samtang, gikan sa Agusto 2 hangtod sa Agusto 17, ang maong sentro nakatala og kinatibuk-an 9,674 ka vaccinees.
Kini nag-operate gikan sa Lunes hangtod sa Biyernes, sugod sa alas 8 sa buntag hangtod alas 5 sa hapon. Kini nag-atiman alang sa mga walk-in nga dunay QR (quick response) code.
Gihatagan niini og prayoridad ang senior citizens ug mga indibiduwal nga naka-eskedyul na.
Modawat lang kini og mga trabahante sa Lapu-Lapu kon makapresentar og balido nga company identification card o valid ID nga magmatuod nga residente kini sa maong siyudad.
Mahimo usab ipresentar ang barangay clearance isip kamatuoran sa iyang pagka molupyo sa Lapu-Lapu.
Ang mga indibiduwal kinahanglan magparehistro ug mo-secure og QR code pinaagi sa https://vims.com.ph/lapulapu/vims/Register.aspx. Ang personal data adto kuhaon sa https://forms.gle/U84h7FyrNoLLUbS37.
Isip kabahin sa ilang corporate social responsibility, ang mga Gatchalian, tag-iya sa duha ka hotels, nipagamit sa ilang pang world class nga function halls sud sa maong hotels isip inoculation sites. Gitawag kini nga “Bakuna Para sa Lahat”.
Nagtanyag usab kini og libreng snacks ug refreshments alang sa mga nabakunahan.
Katambayayong ang Waterfront Hotel sa Mactan sa gitinguha sa kagamhanan sa dakbayan sa Lapu-Lapu nga mabakunahan ang 70 porsiyento sa populasyon niini aron makab-ot ang herd immunity.
“Nandito po kami para po makibahagi sa solusyon. Ang Waterfront po ay kasama sa solusyon,” matod ni Senador Sherwin Gatchalian sa iyang paghatag og mensahe atol sa opisyal nga pagbukas sa hotel isip vaccination center niadtong Hulyo 23.
Ang Waterfront Airport Hotel and Casino sa Mactan maoy labing unang hotel sa Sugbo nga niabli sa iyang mga pultahan aron magamit isip vaccination center.
Dihang nakita sa pamilya nga gikinahanglan ang abag sa pribadong sektor sa paningkamot sa gobiyerno sa vaccination program, wa kini magduhaduha sa pagtabang.
Unang giablihan niini ang Waterfront Insular Hotel Davao sa dakbayan sa Davao isip vaccination site. Gisunod dayon ang duha ka mga hotel niini dinhi sa Sugbo.
Gitahasan sa pamilya ang nagdumala sa duha mga hotel niini dinhi sa Sugbo nga seguraduon nga mahatagan og stipend ug pagkaon ang medical personnel sa vaccination sites.
Sa miaging tuig, ang banay nga Gatchalian uban sa ilang patriarch, Mr. William Gatchalian, niayuda usab sa gobiyerno pinaagi sa pagpanghatag og face masks ug face shields gamit ang ilang personal nga pundo nga nikabat ngadto sa P20 milyones.
Ang face masks ug face shields giapudapod sa lainlaing mga lugar sa Luzon, Visayas ug Mindanao.
Gawas niini, ang pamilya nipadala usab 240 ka mga kahon sa mga panginahanglanon sama sa mga delata nga pagkaon, gatas, noodles, kape, asukar ug uban pa ngadto sa dakbayan sa Tuguegarao sa lalawigan sa Cagayan dihang gipaubos kini sa enhanced community quarantine (ECQ). (PR)