"Karon nalambigit na sad ang iyang departamento sa pundo nga matud pa P67.3 bilyon para niining Covid-19 pandemic. Nasuko ang Malakanyang sa gipagawas nga report sa Commission on Audit (COA) kay nganong gipagawas kuno nga wala pa man matapos ang pag-audit?"
***
Biyaan ta usa ang isyu sa politika ug ang Covid-19 pandemic, atong tutukan karon ang isyu nga mibuto sa Department of Health (DOH) nga gipangulohan ni Secretary Francisco Duque.
Kinsa man si Francisco Duque? Ug unsay mga posisyon diha sa atong gobyerno nga iyang naagian? Unang posisyon nga iyang gikuptan panahon ni Presidente Gloria Macapagal Arroyo gikan sa 2001 nga pagka-chairman sa Civil Service Commission (CSC), ug dinhi nakautang og dakong utang kabubut-on si Mayor Rodrigo Duterte.
Ikaduhang posisyon niya sa panahon ni PGMA gikan sa 2004 mao ang pagka-secretary sa DOH. Ug kon inyong nahinumduman, dunay milagro pud nga gihimo si Duque sa iyang pagka-DOH secretary pinaagi sa sugo ni kanhi PGMA, ang paghatag og P5 milyon Philhealth card nga libre ang pagpa-hospital sa bisa'g asang hospital sa atong gobyerno. Kadto agi'g pagpaneguro ni Arroyo nga dili siya mapildi ni Fernando Poe Jr. nga maoy higpit niyang kalaban niadtong 2004 Presidential Election.
Sa tinuod lang, dili kay karon ra nalambigit ang pangalan ni Duque sa mga milagrong transaction sa iyang mga posisyon kon diin siya ang nangulo sa maong departamento.
Karon nalambigit na sad ang iyang departamento sa pundo nga matud pa P67.3 bilyon para niining Covid-19 pandemic. Nasuko ang Malakanyang sa gipagawas nga report sa Commission on Audit(COA) kay nganong gipagawas kuno nga wala pa man matapos ang pag-audit?
Tubag sa taga COA, wala sila nag-ingon nga dunay kurapsiyon, katungod nila ang pagpagawas ug dili itago kay mao kini ang ilang trabaho - transparency mandatory. Ang gipangita sa COA ngadto kang Duque ang P11.3 bilyon nga kabahin sa P25 bilyon nga gipamalit og mga test kit, face mask ug face shield nga wala pa nila ma-liquidate ug wala pay mga dokumento nga gi-submit sa COA nga niadtong 2020 pa man kini?
Dili COA ang pahimungtan sa Malakanyang, kon dili si Duque kon nganong wala niya ma-liquidate ang bilyon-bilyon nga kantidad nga usa ka tuig na man ang milabay?
Ang problema karon, anaa sa DOH, wala sa COA, tungod kay ang COA is a Constitutional Commission ug dili kini mahimong mahaloan og pamolitika.
Kinsa kini si Atty. Christopher Lao? Matud pa karon ni CANDA ang mipuli kang Atty. Wendel Avisado sa Department of Budget and Management.
Si Lao mao kuno'y responsable sa mga overprice sa pag-purchase sa mga face mask, face shield, test kit ug uban pa. Sa atong pagpanukiduki, si Lao taga Davao diay ni siya.
Karon ari kita sa pangutana, may kurapsiyon ba sa DOH? Hulaton ta ang resulta kay dili mahitabo nga magtumo-tumo ang COA kay dili ni sila politiko. Kon unsa may ilang ipagawas, kana tinuod sa labing tinuod ug unta dili mag-inartista ug magpahilak-hilak si Duque kay luod tan-awon.
***
Paminawa ang KONTRA BALANSE sa DXAL 90.1 Mhz sa FM band sa Radyo ng Masa sa Digos City, Davao del Sur alas 7 hangtud alas 8 sa buntag Lunes hangtud Biyernes.