TACURONG CITY - Padayon ang damage assessment ug clearing operation sa mga ginsakpan sa Sultan Kudarat Provincial Disaster Risk Reduction and Management Office human miigo ang buhawi ug pag-ulan og ice alas 4 sa hapon niadtong Biyernes, Agusto 20, 2021, didto sa Isulan, Sultan Kudarat.
Sa pagkuso-kuso sa buhawi ug pag-ulan og ice, nakaangol og duha ka mga tawo human nga matumbahi og mga kahoy ang ilang balay didto sa Isulan sa maong probinsiya.
Mga samaron pulos molupyo sa Purok Mainuswagon, Barangay Impao sa maong lungsod.
Matud ni Isulan Municipal Disaster Risk Reduction Management Officer Edwin Escleto nga sa wala pa mikuso-kuso ang buhawi ug pag-ulan og ice, gibundakan sa makusog nga ulan ang lungsod ug Tacurong City.
Wa madugay, naghaguros na ang makusog nga hangin dungan sa pag-ulan og yelo.
Tungod sa kakusog sa hangin, gipanglarot niini ang mga atop sa kabalayan, dunay nangatumba nga poste sa kuryente, punoan sa kahoy, mga pananum ug uban pa.
Giingong dakong damyos ang hatud sa maong kalamidad ug padayon karon nga giayudahan sa lokal nga panggamhanan ang mga naapektuhan nga mga molupyo.