Nagkita mig balik ni Konsehal Ely Gentapa gahapon. Kining maong opisyal sa Barangay Gaas, Balamban maoy sinaligan ni Kapitan William Genel pagpalambo sa kanhi opaw nga bahin sa ilang barangay, ngadto sa usa ka matahum nga tinubdan sa klase klaseng mga bulak. Si Konsehal Ely, kansang hinagiban mao ra gyud ang kugi ug determinasyon, niusab sa panagway sa usa ka dakong bukid, nga namungingi sa nagkadaiyang buwak. Kini mao ang gitawag nga Buwakan ni Alejandra.
Sa mga nakabisita na dinhi, mga pagdayeg nga way sama ang mabati. Gawas nga nahimo kining main attraction diha sa Transcentral Highway, nahimo pa gyud revenue maker sa barangay. Tungod sa nag-usab-usab nga quarantine status nga gipatuman sa lalawigan sa Sugbo, lakip nga naapektuhan ang bul-og sa mga bisita.
Matod ni Konsehal Ely, nagmingaw ang barangay, bisan kon bukas ang mga kan-anan, ang buwakan ug uban pang dapit nga kasuroyan. “Di mi angayang maguol, Sir Jun. Tungod sa ka estrikto sa protocol, makalaum ta nga mas madali ang paglibkas sa mga gidili ug mobalik sa naandan ang panginabuhi sa Gaas,” paambit ni Konsehal Ely. Sakto gyud ka.
Hinayhinay lang basta sa panglawas kita nakasiguro. Samtang gipaabot nga mabalik sa normal ang tanan, sekreto sab nga gitukod ang usa sa labing moderno ug pinakanindot nga lokasyon sa usa ka restaurant diha sa sud sa buwakan. Matod ni Konsehal Ely, mo-operate kini karong Oktubre.
* * *
Nakabiyahe mog Carbon karong bag-o? Nakatayming o mao na gyud ni ang naandan? Ang tindera o tindero mobadlong sa kustomer nga ipatarong og sul-ob ang face mask. Duna say mga kustomer nga mobadlong sa mga manindahay, kay face mask nagbitay. Sa ato pa way kumpiyansa. Ug nakatabang dako sa kampanya pagpakalma sa Delta variant. Kamo nabadlongan na ba o nakapamadlong na?