Gisusi sa kapulisan ang usa ka morgue nga gikatahong gihimong bodega sa mga namatay sa Covid-19. Apan dili diay tanan niini mga biktima sa maong balatian. Ang ilang gikahibudngan kay dihay tulo ka minatay nga nagngisi. Ilang gipangutana ang nagbantay sa morgue.
Matod pa sa nagbantay, “Kanang una nga nagngisi, nakadaog na sa lotto, giatake sa kasingkasing ug namatay. Ang ikaduha, 80 anyos nga lalake, nakaasawa og 20 anyos nga babaye, sa kalipay, giatake sa kasingkasing, namatay nga nagtungtong sa kama. Ang ikatulo, gikilatan, ningisi kay abi niyag gilitratohan.”
Way nalipay sa dihang kalit nga napawong ang kuryente ug nalunod sa kangiob ang pipila ka bahin sa lalawigan sa Sugbo ug sa ubang mga lugar sa Kabisay-an niadtong Biyernes sa gabii, Agusto 20, 2021. Ang gipasanginlan sa blackout – kilat.
* * *
Nagsugod ang blackout sa alas 11:56 ang takna sa gabii niadtong Biyernes. Nahibalik ang kuryente sa alas 4:30 sa buntag sa Sabado sa tanang apektadong lugar sa lalawigan sa Sugbo.
Si Betty Martinez, tigpamaba sa National Grid Corp. of the Philippines (NGCP) Visayas, niingon nga apektado sa blackout ang mga lalawigan sa Leyte, Samar ug Bohol.
Apan wa maapektuhi ang habagatang Sugbo kansang kuryente gikan sa power plants sa Toledo City.
Matod ni Martinez, nagsugod ang blackout sa dihang naigo sa kilat ang transmission lines nga nagdugtong sa Barangay Colon, City of Naga sa Barangay Quiot, Cebu City sa alas 11:56 sa gabii niadtong Biyernes. Nikatap ang blackout sa ubang bahin sa Kabisay-an.
* * *
Nagkarapkarap ko sa kangitngit padung sa kasilyas sa pagmata nako sa mga alas dos sa kaadlawon sa Sabado. Maayo na lang kay wa ko mapakong tungod sa dan-ag sa cellphone.
Nahunahunaan nako ang epekto sa blackout sa mga bakuna sa Covid-19 nga anaa sa cold storage facilities sa Sugbo. Maayo na lang kay ang opisyales sa panglawas sa mga siyudad sa Sugbo ug Lapu-Lapu niingon nga way nahitabong vaccine spoilage.
Apan kinahanglan nga imbestigahon ang blackout nga matod pa tungod ra sa kilat. Syaro sab. Wa diay silay lightning arresters aron di maigo ang mga transmissions lines sa kilat?