USA ka 4-anyos nga batang babaye napaig sa sunog sa Little Village, Barangay Basak, Dakbayan sa Lapu-Lapu alas 12:40 sa udto sa Lunes, Agusto 23, 2021.
Ang napaig nailhang si Candice Pailden, kinsa giingong na trap sa ilang balay dihang miulbo ang sunog.
Matod ni FO2 Jeffrey Gerodias, imbestigador sa Lapu-Lapu City Fire District, nagsugod ang sunog sa panimalay mismo sa mga Pailden.
Base sa sugilon sa inahan niining si Malo, naghigda higda siya sa ilang lawak uban ang iyang anak nga si Candice ug laing usa ka tuig nga anak lalake dihang siya nakatulog.
Nakamata na lang siya gumikan kay miulbo na ang kayo sa ilang lawak hinungdan nga dali niyang gisalbar og una ang iyang usa ka tuig nga anak.
Human masalbar, nibalik siya sa ilang panimalay aron salbaron si Candice, apan tungod sa dali nga pagdako sa kayo, wala na kini niya mahimo.
Gani nakaangkon og paso si Malou sa lawas ug lapa lapa sa suway unta niya nga pagsungasong sa nasunog nilang balay.
Ang mga sakop na sa Lapu-Lapu City Fire District nitabang kang Malo aron madala sa tambalanan human makaangkon og paso sa kalawasan.
Naatol nga wala sa pagkahitabo ang bana ni Malo kay namasahero og tricycle isip panginabuhian.
Si Leoman Galinato, igsuon ni Malo, niingon nga ang mama ug iyang pag-umangkon didto sa ikaduhang andana sa balay.
Pagkabantay ni Malo sa sunog, dali kining nanaug aron pagkuha unta og tubig, apan dako na ang kayo.
Iyang gisalbar og una ang usa ka tuig nga anak pito ka tuig nga anak.
Sa iyang pagbalik sa sulod sa balay, dako na kaayo ang kayo hinungdan nga wa na makasaka og balik sa second floor.
Mao kini ang hinungdan nganong nakaangkon og mga paso sa buko-buko ug mga kamot si Malo.
Gawas sa balay sa banay nga Pailden, laing upat ka mga balay ang nangaugdaw nga nakaapekto sa 32 ka mga tawo.
Sa bana-bana sa kabomberohan, moabot sa P430,000 ang danyos sa sunog nga gipaubos sa 1st alarm.
Nadawat kini nila alas 12:40 sa udto ug nakontrolar ala 1:07 sa hapon.
Padayon pang gisusi ang hinungdan sa sunog.
Naghatag og kalisod sa kabomberohan sa ilang pagresponde mao ang kahagip-ot sa dapit nasunogan diin naglisod ug penetrate ang ilang hose.
“Base sa estorya sa Mama (Malo) nagduwa kuno og posporo iyang anak samtang nakatug siya unya mao na dayon to, niulbo ang sunog,” matod ni Gerodias.
Si Lapu-Lapu City Mayor Junard “Ahong”Chan, sa iyang bahin, nipasalig nga ang kagamhanan maoy moabaga sa pagpalubong ni Candice.
Mohatag usab siya og hinabang ni Malo sa iyang pagpatambal sa tambalanan sa iyang naangkong mga paso sa kalawasan.
Pahimangno ni Chan sa mga ginikanan nga bantayan ang mga anak nga dili magduwa og kayo o posporo aron kalikayan ang sunog.
Ang City Social Welfare and Development Office (CSWDO) nang apod-apod na usab og pagkaon sa mga nasunogan.