Driver gisukmag sa biker

GIPANGITA karon sa Casuntingan Police Station ang usa ka siklista nga giingon sa netizens nga nipaila nga National Bureau of Investigation (NBI) agent ug nanukmag sa usa ka delivery driver sa usa ka bakeshop sa Dominggo sa buntag, Agusto 22,2021 sa may dan Hernan Cortes ug A.S. Fortuna, Barangay Banilad, Mandaue City.

Base sa viral video nga nikatag sa social media, dili madunggan ang pagbayloay og istorya sa upat ka mga siklista, duha ka mga lalake ug duha ka mga babaye, tali sa delivery driver ug kauban, apan base sa mga tawo nga nang share sa video nga nagpaila kini nga usa ka NBI agent.

Sa pakighinabi sa Superbalita Cebu kang Police Captain Armil Caloscos, hepe sa Casuntingan Police Station, siya niingon nga nagpa-blotter na si Marvin Lobitania, 30, taga Barangay Bacayan, Cebu City, udto niadtong Agusto 22.

Matod ni Caloscos nga niadtong nagpa-blotter si Lobitania, iyang nakita nga aduna kini bukol sa agtang.

Sa blotter report, sigon ni Calosocos, nga niadtong panahona nagbyahe siya sa may dan A.S. Fortuna, Barangay Banilad, Mandaue City paingon mag-deliver og pan.

Nihunong siya sa traffic light tungod kay stop signal pa.

Samtang nagpaabot, niabot ang duha ka mga lalakeng siklista ngadto ni Lobitania ug niingon “Nganong gi-sweepan man nimo akong kauban?”

Nihimakak si Lobitania nga aduna siyay na sweepan.

Gidapog si Lobitania sa usa ug giingnan siya nga tag minilyon ang iyang bisikleta.

Niaksyon si Lobitania og palayo apan giingnan siya sa suspek nga “Ayaw’g palayo, bunutan tika ron.”

Gisukmag sab si Lobitania kaduha sa iyang nawong sa laing lalake.

Gipasabot ni Caloscos nga mao ra kini ang tinubagay ni Lobitania sa suspek ug wa kini nipaila nga siya NBI agent.

Nagpadayon pa ang imbestigasyon nilang Caloscos aron mailhan ang upat ka mga siklista.

Posibleng physical injuries ug kalapasan sa executive order nga pagdili sa leisure biking ang ipasaka batok sa duha, sigon ni Caloscos.

Sa bahin sa Traffic Enforcement Agency of Mandaue (Team), sigon ni Flor Gitgano, tigpamaba sa Team, nga nihimo sila og kaugalingon nilang aksyon mahitungod sa insidente.

Matod niya nga nagkuha sab sila og mga impormasyon og mga CCTV footage sa insidente aron makatabang sa imbestigasyon sa kapulisan.

Pahimangno ni Gitgano sa mga motorista nga kon magmaneho, kinahanglan ilang patas-an nila ang ilang pasensya aron malikayan ang susama nga insidente.

NBI

Si National Bureau of Investigation (NBI) Regional Director Renan Oliva niingon nga nagpahigayon usab sila og imbestigasyon human nila masayri nga nipaila nga NBI agent ang usa sa duha ka mga lalakeng siklista.

Kon mamatud-an nga tinuod ang pasangil ug mailhan sa ilang imbestigasyon, mapasakaan kini og kasong usurpation of authority. Dihang iyang gitan-aw ang video clip sa internet, wa siya makaila sa lalake.

“Di man na kauban namo. Di familiar ang nawong bah,” nagkanayon si Oiva sa interbyu sa Superbalita Cebu.

Ila na usab nga gikuha si Lobitania ug gidala sa ilang opisina aron kuhaan og pamahayag sa Lunes sa hapon, Agusto 23.

Gawas sa usurpation nga kaso, hayan mapasakaan og physical injury ang duha ka mga siklista.

Ilang gitambagan si Lobitania sa pagpakurasyon og pampublikong tambalanan alang sa ipasakang kaso.

Matod ni Oliva nga kon tinuod man nga nakaigo si Lobitania, mahimo ra unta kining madakop sa siklista.

“Nganong manumbag man nga mahimo man na sa citizen’s arrest,” nagkanayon si Oliva.

Nipadala siya og mga sakop sa Command Center sa Dakbayan sa Mandaue aron pagkuha og mga video footage aron makatabang sa ilang imbestigasyon. (REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph