GIANDAM na sa kagamhanan sa Dakbayan sa Lapu-Lapu ang ilang drive-thru vaccination sa Liberty Shrine sa Barangay Mactan.
Kini ang gipahibalo ni James Sayson, ang deputy officer sa Vaccination Operations Center dihang nahinabi ning mantalaan.
Matod ni Sayson, gituyo kini nga adto sa Liberty Shrine aron usab dako ang lugar alang sa mga sakyanan.
Gibutyag niya nga prayoridad unya niini ang mga tricycle drayber ug drayber sa mga public utility jeepney (PUJ).
Ang kinahanglan ra buhaton nila mao ang magparehistro sa ilang mga tricycle ug PUJ sa kagamhanan aron nga makapahimulos sa drive-thru vaccine gumikan kay gidili unya niini ang walk-in.
Sa mga pribadong indibidwal nga ganahan usab mopahimulos sa drive-thru vaccine hayan mao usab ang ilang buhaton diin kinahanglan nila irehistro ang ilang sakyanan.
Gituyo kini gumikan kay kadaghanan sa mga drayber wala nay panahon nga moadto pa sa mga vaccination site sanglit mangiyawat nga mobiyahe kada adlaw.
“Ang nakalahi ani dili na sila monaog sa ilang mga sakyanan diha na sila turokan,” matod ni Sayson sa Superbalita Cebu.
Isip usab sa pagtubag sa mga hangyo sa pipila ka mga trabahante nga dili usab sila makalugar nga makaduaw sa mga vaccination site panahon sa adlawan gumikan sa ka busy sa trabaho.
Si Lapu-Lapu City Mayor Junard Chan nipahibawo nga mamakuna ang kagamhanan panahon sa gabii aron pag-atiman sa mga busy sa adlawan.
Kini ipahigayon sa alas 4:00 sa hapon hangtod sa alas 9:00 sa gabii.
“Naa man guy uban like call center o unsa pa gikan trabaho or unsa at least makalugar sila ug pabakuna,” matod ni Chan, kinsa nagtinguha nga labing daghan ang mabakunahan sa dakbayan sa labing daling panahon. (GCM)