Gawas sa naandan na nga pagsaulog sa Buwan Ng Mga Wika matag Agusto, dunay laing kasaulogan alang sa kabataan nga gihimo sa ning samang buwan matag tuig.
Matag Agusto 12 ang gitakdang adlaw alang sa International Youth Day ug karong tuiga duna kiniy tema nga “Transforming Food Systems-Youth Innovation for Human and Planetary Health”.
Kini nagpasabot nga sentro sa kasaulogan mao ang hagit nga mausab ang systema sa paghimo ug pag-produce og pagkaon pinaagi sa mga tampo sa kabataan.
Tungod kay dunay mga maayong ideya ang mga kabataan, makatabang kini sa kaayuhan sa kalikupan ug sa hisgutan sa panglawas sa katawhan.
Gipanglantawan sab nga makatabang ang kabataan sa pagtubag sa ubang suliran sa katilingban sama sa pagmenos sa kakabus, pag-improve sa health care, pagtubag sa mga hagit sa biodiversity conversation ug ubang lakang nga maresulba ang climate change.
Pinaagi sa maong tema sa International Youth Day, giawhag ang mga kabataan nga musalmot sa maong global effort labaw na nga padayon nga giatubang ang mga dagkong environmental problems ingon man ang pagtumaw sa makahulga nga Covid-19 virus nga tataw nga nakaapekto sa matag nasod nga naigo sa pandemiya.
Mao nga karong umaabot nga Agusto 31, Martes, dunay giorganisa ang Children’s Legal Bureau pinaagi sa matag buwan nga online discussion series nga Para sa Kabataan (PSK) nga panaghisgot sa partisipasyon sa kabataan sa pag-atubang sa pandemiya.
Ang resource speaker sa maong episode “Empowering Youth Amid Covid-19” mao ang Cluster Head alang sa Rehiyon 7 ug 8 sa National Youth Commission (NYC) nga si Sheridan Athena Y. Gajete.
Duna poy mga child rights advocates sama nilang Ma. Menie Baring ug Cybel Tantay nga gitahasan nga muhatag sa ilang reaksyon sa mga mahisgutan unya sa resource speaker sa maong panagtigom.
Gawas nga usa kini ka post-celebration sa International Youth Day, gitinguha sa CLB nga madunggan ang mga programa sa NYC ug ilang mga lakang sa pag-empower sa kabataan bisan pa man nga dunay pandemiya.
Dili malimod nga usa ang kabataan sa labing naapektuhan sa Covid-19 pandemic labaw na sa ilang pag-eskwela ug pagpanrabaho.
Mao nga angay nato nga madunggan ang tingog sa kabataan ug magkahiusa kita nga mapalig-on ang maong sektor.
Alang sa mga interesado nga motambong sa kalihukan, mahimo kamo nga mo-register niining maong link: https://tinyurl.com/PSKYouth2021.
Mahimo sab kamo nga mo-like sa Facebook page sa Children’s Legal Bureau diin makita linawas ang maong episode karong Agusto 31.
[Lindog sinuwat ni Atty. King Anthony Perez, usa sa mga abogado sa CLB. Mahimo nga mopadangat sa inyong mga suliran o sumbong sa kaso sa pagpangabuso pinaagi sa pag-email (clbphilscebu@gmail.com) o i-send ang mensahe sa Facebook Messenger: m.me/ChildrensLegalBureauInc]