TALAGSAON nga pagpangalad ang gipakita ni Lapu-Lapu City Mayor Junard “Ahong” Chan sa katawhan nga iyang gialagaran.
Nakita nako ang post sa mayor sa social media nga gitubag ang hangyo sa pamilyang Lindy Lapinig, kinsa nagpatabang pinaagi sa programang “Talk to the People: From Me to YorMe” sa Facebook Live nga mabutangag bungbong ug sawog ang ilang balay.
Ang gihimo ni Chan nakita ni nako sa programa ni Raffy Tulfo nga motabang. Mao nakaingon ko si Chan mora og si Tulfo.
MODERNONG MERKADO
Wa pa gani maka-operate ang New Carbon Market sa Dakbayan sa Sugbo, daghan naman diay mga molupyo sa siyudad ang nakapahimulos.
Akong na-interview ang pamilya sa unang nakapahimulos kay ang ilang anak ug bana nakatrabaho sa padayon gipabarug sa modernong merkado pinaagi sa Megawide.
Nakahinundum ko ani sa gipamahayag ni Cebu City Mayor Edgardo Labella, prayoridad ang mga molupyo sama sa taga Barangay Pasil, Ermita ug uban pa ang pasudlon ug trabaho kay naapektahan sa pandemic.
Matod pa sa ginikanan nakatrabaho ilang anak ug bana sa gitukod ang bag-o ug modernong merkado wala na sila magka problema sa inadlaw nga panginahanglan.
Ang modernong merkado gikinahanglan sa pagkakaron. Ang Cebu City giilang Queen City of the South apan naunhan sa gagmayng siyudad sa kanindot sa merkado.
MAGKONTRA NA?
Si 2nd district Provincial Board Member Edcel Gallos mitumaw nga mokontra sa pagka kongresista ni PB Tata Salvador sa maong distrito.
Ang report nagbutyag, bintaha ni Salvador kay kugihan ug nagsuroysuroy sa mga lungsod ug naghatag ug ayuda taliwa sa pandemya samtang si Gallos na busy sa negusyo sa pagka contractor.
PRESIDENTE SA KUSOG
Daghan ang nakadayeg sa presidente sa Kusog nga si Cebu City Councilor Raymond Garcia sa pag-donate og 87 ka personal protective equipments (PPEs) sa personnel sa Cebu City Medical Center (CCMC).
Nakahatag na sab si Garcia og tambal, vitamins, food packs, bugas ug daghan pa sa mga nagkadaiyang barangay sa siyudad. Email: efrenlonzon71@ gmail.com / Text: 09235562777