NAGKADAGHAN ang problema karon sa nasod tungod sa Covid-19. Usa kini sa mga hinungdan nga naa sa hot seat pirmi ang kalihim sa Department of Health (DOH) nga si Sec. Francisco Duque.
Misamot kainit ang lingkoranan ni Duque sa dihang sunodsunod nga migawas ang balita nga daghang pundo ang DOH nga wala magasto, ug kadtong nagasto sobra ra pod ka mahal ang presyo.
Nanawagan ang bagang hut-ong sa katawhan nga angayan na nga pulihan si Duque kay palpak ang iyang pagdumala sa DOH.
Apan mibarog pabor kaniya si Presidente Rodrigo Road Duterte (PRRD). Gani, midupa pa sa katawhan si PRRD nga walay pangurakot sa DOH bisan taliwala sa audit findings sa Commission on Audit (COA).
Unsa man gyod ang habak ni Duque nga hilabihan man ang paglaban ni PRRD kaniya?
Kon imong tan-awon sa mga nangaging panghitabo, daghan na kaayo og gipalagpot, ay di diay, gitangtang diay, si PRRD.
Pananglitan, natangtang si kanhi Sec. Jesus Dureza, Pete Laviña ug daghan pa, lakip pa gani si kanhi CabSec Jun Evasco. Buyno, nabalik na pod hinuon si Evasco karon sa kabinete.
Kon imong batikoson ang gihimo ni PRRD sukad pa sa una, makita nimo nga di siya magmakuli pagtangtang kon adunay pangurakot nga naapil. Dali ra kaayo makahukom si PRRD sa pagtangtang sa opisyal kon naapil kini sa mga isyu sa pangurakot.
Apan lahi ang nahitabo ni Duque. Mibarog gyod si PRRD kaniya nga limpyo siya ug tarong bisan pa sa mga dokumento gikan sa COA.
Unsa gyod kahang klaseha sa habak ang naa ni Duque nga gamhanan man kaayo?
Mobalik pa ba kaha ang panahon nga libre maglakaw-lakaw ang mga tawo nga walay face mask ug face shield?
Lisod kini tubagon kay gani karon, nanganak na man ang Covid-19 og daghang mga anak o variants, nay Delta, naa poy Lambda ug uban pa.
Wa pa gani ta kahuman sa Covid-19 kay wa pay klaro nga tambal, naa na poy mga anak ang Covid-19. Unsa na pod kaha ang tambal nining mga sakita ni?
Walay undang ang mga nangamatay sa Covid-19, gani di na maapas sa mga crematorium ang pagsunog sa mga patayng lawas, naglisod na sab karon ang mga ospital sa gidaghanon sa mga pasyente.
Ang kapait ra ba kay wa nay vigil-vigil ang patay, diretso na lang lubong, wa nay daghan pang seremonyas. Di pa mabisita sa ospital, di pa gyod makatukaw, pastilan grabeha gyod nis Covid-19.
Plus kadtong nahibilin, likayan pa gyod sa mga tawo sa kahadlok nga matakdan og Covid-10 bisan kon laing sakit ang namatyan.