NITUMAN ang mga drayber ug konduktor sa mga bus de pasaheroan sa Cebu South Bus Terminal sa Executive Order 35-B nga giisyu ni Cebu Governor Gwendolyn Garcia paggamit sa air purifier sugod kagahapon, Agusto 25, 2021.
Matod ni CSBT manager Carmen Quijano dihang nahinabi sa SunStar Cebu, nga apil ang mga terminal guard mohiling sa air purifiers kon gisuot ba kini sa mga driver ug konduktor sa mga bus.
“Sa akong nakita ganiha, puro gyud ni-comply. Ang tanang drivers nagsuot gyud og air purifiers,” matod ni Quijano.
Dugang pa niya nga wa usab naapektuhan ang operasyon sa CSBT sa pagpatuman sa kamanduan sanglit gihatagan sa mga bus operator ang ilang mga driver ug konduktor.
Sigon pa ni Quijano nga iyang nabantayan sukad sa pagpatuman sa EO, mosulod na sa terminal ang mga pasahero ug PUVs. Tungod niini, nisaka usab ang koleksyon sa CSBT.
Samtang, gisugdan na sa Probinsya sa Sugbo ang pagpanghatag og vitamins sa mga driver ug konduktor nga makonsumo sud sa usa ka buwan.
Ang driver ug conductor nga masakpan nga wa magsuot og air purifier maisyuhan og temporary operators permit (TOP) o citation ticket sa awtoridad.
Susihon usab sa mga sakop Cebu Police Provincial Office (CPPO) kon nituman ba ang mga PUV magmontar og footbath, thermal scanner, proper ventilation ug 75 porsyento nga minimum capacity.