MOBALOR og P70,000 ang gigahing pundo ni Kongresista Paz Radaza sa dakbayan sa Lapu-Lapu ang iyang gihinabang ngadto sa mga nasunogan sa Sitio Kadurong, Suba-Masulog, Barangay Basak niadtong Lunes, Agusto 23.
Gikuha kini niya sa iyang personal nga kuwarta ug maoy gipamalit sa bugas, tubig, groceries, mga gamit sa balay sama sa Kaha, Kaldero, Palanggana, Baldi, Kabo, Kutsara, tinidor ug lakip na ang mga laundry detergent ug bath soap.
Atol sa iyang pagbisita sa Sitio Kadurong, iya usab gibisita ang haya sa namatay nga 4-anyos nga bata nga naapil pagkasunog sa sunog aron mapaabot ang iyang personal nga pahasubo sa amahan sa bata.
Gitabangan usab sa Kongresista ang inahan sa batang namatay sa sunog nga si Malo aron dali nga mapahimutang sa Vicente Sotto Memorial Medical Center (VSMMC) diin kini kasamtangang gi-admit gumikan kay nagkinahanglan ug operasyon human nga nakaangkon ug paso sa kalawasan atol sa sunog.
Gisaaran usab niya ang bana ni Malo nga dili mabalaka sa gasto sa tambalanan sanglit abagahon kini sa iyang buhatan lakip na ang mga medical assistance sa higayon nga makagawas na kini.
Giawhag ni Radaza ang mga Oponganon nga nagkinahanglan og medical assistance, burial assistance, hospitalization ug laboratory test nga mahimo ra nga maktawag sa mga numero nga iyang gipost sa iyang Facebook page sanglit temporaryo una niyang gisirad-an ang iyang District Office sa Brgy Basak ug nag work from home una iyang mga staff nunot sa nagkataas nga kaso sa Covid-19 sa dakbayan.
“Naa tay funds sa Sotto di-in matag Oponganon nga modangop sa atong opisina nga tua na admit, mahimo ra nga tabangan nato nga wala silay mabayran bisan piso sa ilang hospital bill,” matod ni Radaza.
Si Lapu-Lapu City Mayor Junard ‘Ahong’ Chan una na usab nga nangapud-apod og hinabang sa nasunogan ug mipasalig og cash assistance aron makapatukod pagbalik sa ilang nasunog nga mga panimalay. (GCM)