GIILANG legend sa natad sa drama ug pagpanibya sa radyo sa Sugbo nga si Susan Perez Aliño namatay sa Miyerkules, Agosto 25, 2021. Siya 74 anyos.
Si Aliño nag-alagad sa sibyaanang dyHP sa taas nang katuigan, diin ang iyang tingog sa dramang “Handumanan sa Usa Ka Awit” nanawkanaw sa kahanginan sa dekada 70, 80 hangtod sa tunga-tunga sa dekada 90.
Siya usab ang naila nga deejay nga si Sexy Susan sa kanhi dyXL FM.
Gikan sa dyHP, nibalhin siya sa sibyaanang dySS sa 1997, diin iya kining gidumala hangtod sa iyang kamatayon.
Matod ni Superbalita Cebu columnist ug dySS program director chief operations officer Bobby Nalzaro, samtang nagdumala sa radyo, gihuptan usab kanhi ni Aliño ang RGMA 7 TV hangtod sa iyang retirement sa edad nga 60 anyos.
Siya ang usa usab sa mga utok sa GMA 7 Balitang Bisdak dihang gilusad kini sa 1999.
Matod ni Nalzaro nga samtang nag-alagad pa si Aliño sa radio RMN, gitanyagan siya ni Mike Enriquez sa RGMA Manila nga maoy himuong station manager sa dySS.
“Si Susan pud maoy nagkuha nako as her program manager and anchor from Bombo,” asoy ni Nalzaro.
Ubos sa pamunoan ni Aliño, daghang mga Radio GMA stations ang nabuksan sa tibuok nasod, butyag ni Nalzaro.
“She was a nice boss, though, may pagka estrikta. She treated us as her children,” dugang niya.
Wa pa moluwat og pamahayag ang pamilya labot sa iyang kamatayon, apan ang lubong ilang himuong pribado tungod sa mga restriction sa Covid-19. (REV)