Imy Tampos, Guilliam Roque sa Putot Shots / Hulagway
NIINING ikaduhang edition sa atong Super Suroy section diin naghatag kita og giya sa mga lugar nga suroyanan apan gumikan sa pagpaubos sa Lalawigan sa Sugbo sa modified enhanced community quarantined (MECQ) kasamtangan nga gisira ang mga lugar nga tapukan sa lokal nga turista.
Sa miaging semana ang tulo ka inila nga suroyanan sa Lungsod sa Cordova, Sugbo ang gidid-an nga masudlan sa mga buot mosuroy maoy atong gipamantala, alang sa dugang pahibawo.
Karon atong tukion ang bike route sa Dakbayan sa Talisay, Cebu diin mga siklista nga di taga-dakbayan ang gidid-an nga mosulod.
PAHIBALO
Niadtong Agosto 17 niluwat og opisyal nga pahibalo si Talisay City Mayor Gerald Anthony Gullas nga kadtong mahiligon sa leisure biking nga sagad mosubay sa Campo 4 ug Manipis route, gidili sa kadtong dili residente sa dakbayan sa Talisay.
Ang announcement nga gi-post sa mayor sa iyang official Facebook account agi og tubag sa kabalaka ni Talisay City Police Chief Lieutenant Colonel Gerard Ace Pelare sa pagdagsa sa mga bikers sa Campo 4 ug Manipis ilabi na sa adlawng Sabado ug Domingo.
Kini gumikan sab ang silingang LGU, particular na ang Dakbayan sa Sugbo wa motugot sa leisure biking ug gikabalak-an nga mohugpa ang ang mga bikers sa Manipis route.
Apan gipasabot ni Gullas ang kapulisan nga ubos sa Inter-Agency Task Force’s (IATF) guidelines, gitugot ang leisure biking sa kondisyon nga motamod sa minimum health protocol.
Hinungdan nga gipaklaro sa mayor nga magpadayon ang leisure biking sa Talisay City ug bugtong nga tugotan nga makahimo niini mao kadtong Talisay City residents lang.
Sa maong paagi, kalikayan ang “overcrowding in areas of convergence” sa Manipis kini samtang gipa-ubos pa sa MECQ status ang lalawigan lakip na ang Talisay.
Gitugotan lang sab kadtong mga nagbiseklita nga mosud sa Talisay nga taga-Cebu City ilabi na niadtong mga nanarbaho kansang mode of transportation mao ang pagtindak sa biseklita.
Mipasidaan si Gullas nga taliwala sa maong limitasyon nga gipatuman apan aduna gihapoy tapok-tapok sa naasoyng mga lugar ug wa mosubay sa health protocol, morekomindar ang mayor sa hingpit nga pagpasira niini alang sa mga siklista.
MANIPIS
Ang Manipis Road naila nga nipis nga kalsada nga milagbas sa bukirang bahin sa Central Cebu nga nagsumpay sa Talisay City ug Toledo City.
Ang Campo 4 nagsilbi nga bike stop sa mga siklista gikan sa ilang lagyo nga distansiya sa pagbiseklita, diin sa maong lugar mamahimo sila makapahuway ug adunay bike servicing area kadtong makasugat og aberya sa ilang biseklita.