USA ka lalake gipusil-patay sa Sitio Malipayon, Barangay Inayawan, Dakbayan sa Sugbo niadtong Miyerkules sa hapon, Agusto 25, 2021.
Ang biktima giila sa kapulisan nga si Norwin Estella Manayaga, 31, molupyo sa naasoy nga dapit ang gipusil wa pa mailhing lalake samtang padulong unta kini nga mopalit sa usa ka tindahan.
Matod sa taho sa Pardo Police Station, kalit lang miduol ang mamumuno ug dayong pusil sa makatulo ka higayon gamit ang wala matino nga kalibre sa armas.
Human sa pagpamusil, dali usab nga nisibat ang mamumuno nga nagdagan subay sa barangay road.
Naigo sa dughan ug liog lakip sa walang abaga ug sa ulo nga hinungdan sa iyang hinanali nga kamatayon.
Matod sa pamahayag sa live-in partner sa biktima nga si Lucia Pacinabo, 41, nga sa miaging mga adlaw nakadawat og hulga sa kinabuhi ang iyang kapuyo gikan sa usa ka priso nga naa sa sulod sa Cebu City Jail nunot sa kaso sa illegal nga drugas.
Matod ni Police Lieutenant Colonel Wilbert Parilla, deputy chief for operation sa Cebu City Police Office (CCPO), ang biktima gipasanginlan sa usa ka drug personality nga naa pa sa bilanggoan nga amahan sa gimabdos sa uyab niini.
Ang maong babaye maoy kanhi live-in partner sa biktima nga giingong nalambigit usab sa illegal nga drugas.
“Nasuko daw ni ang uyab sa iyang kanhi kapuyo nga naa sa jail,” matod ni Parilla.
Wala lang una nganli ni Parilla kinsa ang maong drug personality nga naa sa prisuhan sanglit mipalawom pa sila sa ilang imbestigasyon.
Apan nakasiguro na sila nga love triangle ang motibo sa krimen tungod sa pamahayag sa live-in partner. (AYB)