MIABOT na sa 16,492 ang kinatibuk-ang ihap sa mga kumpirmadong kaso sa Covid-19 sa Cagayan de Oro City human 156 ka mga residente sa dakbayan ang positibo sa novel coronavirus. Usa niini returning overseas Filipino worker (ROF) ug 155 ang lokal nga mga kaso.
Sumala sa City Health Office, sa 155 ka mga bag-ong lokal nga kaso, 105 ang mga local index, 32 ang mga close contacts sa mga pasyenteng nagpositibo sa coronavirus, siyam ang mga lokal authorized persons outside residence (Apors), lima ang mga Apors with link, ug upat ang patay.
Ang Cagayan de Oro adunay 3,266 ka mga aktibong kaso. 872 niini na-admit sa Northern Mindanao Medical Center ug uban pang mga ospital sa siyudad, ug 2,394 ang mga outpatient.
Nakatala usab og 100 nga nakarekober sa sakit. Anaa na karon sa 12,525 ang ihap sa mga nakarekober sa dakbayan.
Ang ihap sa mga namatay sa Covid-19 sa dakbayan anaa na sa 701.