Cebu City mohatag og dugang cash incentive sa senior citizens

ADUNAY dugang rason aron mokaon og pansit ang mga lolo ug lola alang sa long life.

Kini human giaprobahan sa Cebu City Council ang amendment sa Cebu City Ordinance No. 2235 adunay title nga “An Ordinance Conferring the Centenary Senior Citizens’ Award to Qualified Senior Citizens, on October on Each Year” nga giduso nila ni Cebu City Councilors Eugenio Gabuya Jr., Lea Japson, ug Raymond Alvin Garcia.

Ang maong kausaban sa ordinansa naaprubahan niadtong Agusto 18, 2021.

Matod ni Gabuya nga sa pag-usab sa ordinansa, gipamub-an ang age range sa mga makadawat sa cash incentives.

Sa miagi nga mga tuig, ang Dakbayan sa Sugbo nag-award og P100,000 sa mga senior citizens nga makaabot og edad nga 100 anyos.

Base sa giusab nga ordinansa, mahatagan og cash incentives nga P5,000 ang mga senior citizen nga nagpangidaron og 80 anyos hangtod sa 89 anyos; ug P15,000 sa mga nagpangidaron og 90 anyos hangtod 99 anyos.

Sa tuig nga moedad na sila’g 100 anyos, mahatagan sila og P80,000.

“Ang ato ani kay kani atong mga senior citizen, in the age of 100, makadawat gyud ni sila’g P100,000. Mao na atong gikuan nga daghan man gud senior citizens, usahay di kaabot sa 100, unya inig abot sa 80 (anyos), daghan daghan na gyud og gibati og mga sakit sakit maong among gibahin,” pagpasabot ni Gabuya.

“Gibahin namo. Ig 80 years old, kadawat siya, ig 90 years old kadawat siya, ig 100 mao to ihatag ang remaining nga sobra,” segun niya.

Matod ni Gabuya nga makatabang ang maong cash incentive para pagpalit og mga medisina o bitamina nila.

Matod ni Gabuya nga posible nga maimplementar ang ordinansa sa 2022.

Matod niya nga kuhaon ang budget alang sa programa sa 2022 annual budget.

Target nga inisyal nga budget para sa programa kay P50 ka milyones, matod ni Gabuya.

Para kang Necitas Babol, 70, residente sa Dakbayan sa Sugbo, ang maong programa angay atngan.

“Nalipay. At least naay maabot ug maningkamot nga mabuhi,” matod ni Babol.

Ang Office of the Senior Citizens Affairs (Osca) ang implementing office sa programa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph