INILANG manlalaban sa Dakbayan sa Sugbo namatay sa pagbanhig sa wala mailhing lalake nga nag-atang nang daan kaniya sa eskina sa Good Shepherd ug dalan Duterte, Banawa, Barangay Guadalupe, Dakbayan sa Sugbo alas 4:10. Huwebes sa hapon, Agosto 26, 2021.
Ang manlalaban mao si Rex Fernandez samtang naangol usab ang iyang driver nga naigo sa lawas ug daling gidala sa usa ka tambalanan sa Siyudad sa Sugbo.
Matod ni Police Major Jonathan Dela Cerna, hepe sa Guadalupe Police Station, tulo ang mga sakay sa grey nga Toyota Camry (ZBL 485) usa niini babaye nga naglingkod sa luyo.
Nakaangkon og mga samad pinusilan si Fernandez sa iyang lawas gikan sa kalibre .45 nga pistola.
Sa kuha sa close circuit television (CCTV) camera sa usa ka establisemento, makita ang usa ka lalake nga nagbarog sa kilid sa Julie’s Bakeshop nga nakapuwa og sweat shirt ug naka mask.
Sa dihang iyang nakita ang sakyanan ni Fernandez nga paingon na moliko sa dalan Duterte, dali ning nga midagan sa passenger side sa sakyanan kung asa galingkod si Fernandez ug dayong pamusil sa makadaghan.
Human sa pagpamusil, nidagan kini paingon sa nagpaabot nga motorsiklo nga kolor puwa ug dayong sibat paingon sa eskina Banawa ug V. Rama.
Usa sa mga saksi nga dili magpahingan nagkanayon nga paka-paka sa buto ang ilang nadungog, apan una niyang nakita ang gunman nga midagan paingon sa sakyanan sa manlalaban.
“Sa ako gyud pag agi nako, diri man gyud ko pagkahitabo.Sa akong nabantayan, katong gunman mura syag milabang. Paglabang niya, kining sakyanan (gisakyan ni Fernandez) mi slow down, pag-abante na, diha na paka-paka na,” matod sa saksi.
Gisubay karon sa kapulisan ang anggulo sa iyang trabaho isip abogado, apan wala usab nila wad-a ang ubang mga motibo.
Sigun ni Dela Cerna nga sayo pa kaayo kon motutuk na sila sa mga anggulo sa krimen.
“Tanang angulo ang atong tan-awon, relation sa iyang trabaho being a laywer. Nya iyaha sad nga personal ingon ana bitaw. Considering nga abogado, tanan atong tan-awon,” matod ni Dela Cerna.
Dugang ni Dela Cerna nga posibling adunay umolon nga Special Investigation Task Force ang Cebu City Police Office tungod kay usa ka abogado ang biktima.
Si Fernandez nag hunger strike mga duha ka semana ang nakalabay sa condominium nga iyang gipuy-an tungod sa pagputol sa supply sa tubig.
Siya usab ang usa sa mga legal counsel sa vendors sa Carbon Public Market nga mibabag sa pagtukod sa modernong merkado, ug sa mga magtutudlo sa Lumad nga gidakop sa Police Regional Office 7 (PRO) 7 human pasanginli nga mikidnap sa mga bata gikan sa Talaingod, Davao Del Norte.
GIKONDENAR
Ang Integrated Bar of the Philippines (IBP) Cebu Chapter mikondenar sa pagpatay kang Fernandez. Gikasuko sa mga abogado ang linuog nga pagpatay kang Fernandez.
“The entire legal community cries in anger at this ruthless murder which brings immeasurable horror to the family, friends and colleagues of Atty. Fernandez,” matod sa opisyal nga pamahayag sa IBP.
Matod nila nga ang pagpangatake sa usa ka abogado usa ka pagpangatake sa sistema sa hustisya ug balaud.
Makigtambayayong sila sa mga awtoridad alang sa kasulbaran sa kaso.
Ila usab nga giawhag ang mga establisemento nga dunay CCTV footage sa pagkooperar sa mga awtoridad.