MANAGLAHI ang mga numero sa mga ahensya sa kagamhanan kalabot sa mga nangasakit ug nangamatay sa coronavirus disease 2019 (Covid-19). Hayan usa ni sa mga hinungdan sa kalibog ug pagduda sa katawhan. Unsa man gyud?
Bisan ang mga journalist usahay maglibog kinsa ang tumanon ug kinsa ang mas tukma nga numero sa nangasakit ug nangamatay. Hinuon, gitataw sa Department of Health (DOH) nga ang ilang data mahimong mag-usab-usab kay gidoble pa sa pagsusi.
Apan bisan kon dunay kalainan ang mga numero sa mga ahensya sa kagamhanan nga gitahasan sa pagkombate sa Covid-19, paspas karon ang pagpanakod ug daghan ang nangamatay. Sa Cebu City lang, sa Agusto 2021 mag-average og mga 10 ka tawo mamatay sa Covid-19 matag adlaw kon basehan ang data sa Emergency Operations Center (EOC).
Angay sabton ang mga buhatan sa kagamhanan kon managlahi ang gidaghanon sa ilang mga lista tungod kay di lalim ang pagkuha sa tukmang mga kasayuran samtang limitado ang gidaghanon sa ilang mga tawo.
Managlahi man, makita gihapon ang kapaspas sa mga pagpanakod ug mas daghan kon itandi sa 2020. Mas daghan usab ang nangamatay karon sa Covid-19 itandi sa miaging tuig. Tunga-tunga pa lang gani sa Agusto, hapit na mokatunga ang gidaghanon sa mga kaso sa unang pito ka buwan sa 2021. Gibasol ang pagsaka sa mga kaso ning third wave sa Covid-19 sa Delta variant.
Bisan tuod di managpareho ang ilang lista, di kini angay nga ikahibung. Di kini angay dudahan kon tinuod ba o di. Tinuod nga misulbong ang gidaghanon sa nangasakit ug nangamatay. Ang nahitabo sa mga ospital usa ka kongkretong ebidensya nga mas paspas ug mas isog ang variant nga nanakod karon.
Mao nang mibalik pag-estriktog maayo ang kapulisan sa pag-estrikto pagpatuman sa curfew ug mga health protocol. Kay kon numero ang tan-awon, managlahi man tuod, wa kini mamakak.