DUGAY nang giindosar si Presidente Rodrigo Duterte nga padaganon pagkabise presidente sa Partido Demokratiko Pilipino–Lakas ng Bayan (PDP-Laban) Alfonso “Al” Gaba Cusi wing. Nagpaabot lang ang mga botante kon dawaton ba kini sa Presidente. Hinuon, kadaghan na siya nipasabot nga gusto siyang mulansar sa maong posisyon aron, suma niya, nga aduna siyay immunity from suit. Apan dili pa siguro kon dili ba siya makiha kon modaug siya pagka-bise presidente. Suma sa Konstitusyon impeachable official ang bise presidente. Wala pay desisyon ang Korte Suprema kalabot niini.
Karong bag-o, gipahibawo na ni Duterte nga modagan gayud siya sa pagka-bise. Siya maoy gipapili kon si kinsa ang iyang standard bearer. Apan bisan ang PDP-Laban mi-indorso na usab kang Senador Bong Go nga maoy padaganon pagka-presidente. Apan anaa gihapoy babag sa tinguha ni Digong ug kini mao ang kandidatura ni Davao City Mayor Sara Duterte Carpio, iyang anak. Suma pa ni PDP-Laban vice president Karlo Nograles nga nipahibawo na si Digong nga dili siya modayon pagdagan kon mulansar si Sara pagka-presidente. Apan ang kadaghanan sa mga dumadapig nila way nakitang problema bisan kon anaay Sara for president ug Digong for vice-president.
Sa laing bahin, si kanhi senador Bongbong Marcos isog na kaayong namahayag nga mulansar usab siya pagka-presidente. Ang gituhoan kaniadto nga maghuwat siya sa endorsement ni Duterte daw wa nay bali karon. Alang kaniya nga ang mga Marcos wa nay utang kabubot-un sa Presidente kay una man nga adunay utang kabubot-un ang mga Duterte kang anhing president Ferdinand Marcos ug gibayran lang kini karong bag-o ni Duterte. Ang Ping Lacson-Tito Sotto tandem siguro na sa ilang kandidatura. Si Bise Presidente Leni Robredo naghuwat pag hustong suporta ug higayon usa kini modesisyon nga modagan sa pagka-presidente o kaha magpabilin ba pagka-bise.
Si Senador Manny Pacquiao gipaabut pa sa iyang mga dumadapig alang sa iyang desisyon. Hapit tanan hinuon sa mga sakop sa Manny Pacquiao for President Movement (MPPM) nagpaabut sa official announcement sa ilang idolo. Nisaad hinuon ang people’s champ nga mopahibawo siya sa iyang plano sa pulitika sunod buwan.
Kon dunay labing minus upat ka kandidato pagka-presidente, aduna usay upat ka mga kandidato sa pagka-mayor sa Cebu City ug sa ubang mga dapit. Dinhi sa siyudad, daghang matintal sa pagdagan pagka-mayor. Karon sila lang si Bise Mayor Mike Rama sa Barug ug Tomas Osmena o kaha si Franklyn Ong ug Bebot Abellanosa sa BO-PK ang mukandidato. Kon naay upat ka presidential candidates tingalig molansar usab si Joey Daluz sa Panaghiusa ug laing kandidato nga mopaluyo sa Lacson – Sotto tandem. (mannyrabacal1144@gmail.com)