KIDAPAWAN CITY -- Plano karon nga ipreserba sa Department of Environment and Natural Resources (DENR-North Cotabato) ang nakompiska nilang sawa niadtong Huwebes nga giingong usa sa mga gikonsiderang pinakadako nga halas sa Rehiyon 12.
Kahinumdoman nga mahimo untang pulutan ang sawa kon wala makompiska sa mga opisyal sa barangay alas 7 sa gabii sa maong adlaw.
Sa taho gikan sa Municipal Disaster Risk Reduction Management Office sa Tulunan, nasayran nga nakadawat sila og taho bahin sa dakong sawa nga napalit sa usa ka molupyo sa Barangay Dungos sa lungsod nga giingong nadakpan gikan sa Liguasan Mash apan nakompiska sa mga opisyal sa barangay.
Adobohon unta sa nakapalit sa sawa aron isuwa sa pamahaw ug ilang himuong pulutan sa inom apan napakyas kay gikompiska kini human nga nahibaloan sa mga barangay opisyal, uban ang mga sakop sa Barangay Peacekeeping Action Team (BPAT).
Namatay ang sawa human makaangkon og daghang mga samad sa nagkadaiyang parte sa lawas.
Duna kini gitas-on nga 20 piye ug dako kaayo ang lawas nga kaya niyang patyon ang usa ka tawo kung iyang malikusan ang lawas.