TAWGA lang ko og buang ayaw lang tiguwang’ ang kanunay nga komedyang tubag ni Monang, akong 80-anyos nga silingan kada sungog nako niya kay sa tinuod lang, di man siya mailhan nga edaran na kay lagsik ug tul-id pa man og pamarog itandi niadtong mga singkwentahon pa apan nagbinuktot na og barog kay dunay osteoporosis.
Matod sa Lifestyle-focused.com kining osteoporosis usa ka kondisyon sa kabukugan diin ang mga bukog naghinay og kahuyang ug kapulpog kay ang mga tissue sulod sa lawas dali rang mangaluya una kini mapulihan maong monipis ug mangaluya.
Matod sa National Center for Health Statistics, kumon kining mahitabo kung ang babaye magsugod na og menopause (maundang na ang regla) kay moubos naman ang estrogen sa lawas maong motaas sab ang stansa nga magka-osteoporosis.
Ang ubang rason sa kaliwat (ang inahan o apuhan duna daan ini), nakaagi og chemotherapy, palainom, ug sige og panigarilyo.
Kasagarang matakdan ini, ma lalaki o babaye, mga puti o taga Asya nga dako og kakuwang sa Calcium o Bitamina D.
Ang mga eksperto mirekomendar ining mga pagkaon nga makapataas sa bone density ug makatabang pagpalayo ining sakita:
Mga dairy products sama sa gatas, cheese ug yogurt kay taas kini og calcium.
Berding utanon sama sa agbati, kamunggay, pechay, broccoli kay taas kini og calcium ug bitamina K.
Nuts sama sa almonds, pistachios, cashews kay daghan kini og magnesium ug calcium.
Itlog kay taas kini og bitamina D og protina nga maka-ayo sa kabukugan.
Isda sama sa tuna, makerel og sardinas kay taas sa bitamina D. Duna sab kini omega-3 fatty acids nga makapalig-on sab sa atong kabukugan.
Prutas nga taas og bitamina C sama sa oranges, mansanas, saging, pineapple og grapefruit.
Lean meats sama sa manok nga way panit o unod sa baboy o baka (nga way tambok) kay taas kini og protina nga makapadaghan sa tissue sa atong lawas.
Katapusan kining mga calcium-enriched foods sama sa orange juice, cereals o pan nga fortified sa manufacturers.