BASAHON sa kinabuhi sa mga bayani dili mapughaw. Magdungan tag pakli sa libro sa kasaysayan matag kataposang Lunes, Agusto 30, nga National Heroes' Day.
Miula sa ilang dugo batok sa mga Katsila nga miulipon kanato dul-an sa 400 ka tuig sila Dr. Jose Rizal, Andres Bonifacio, Gregorio del Pilar, Marcelo H. del Pilar, Toribio del Pilar, Diego Silang, Josefa Gabriela Silang, Josefa Llanes Escoda, Apolinario Mabini, Francisco Balagtas, Francisco Baltazar, Francisco Dagohoy, Tomas Pinpin, Antonio Luna, Juan Luna, Emilio Aguinaldo, Emilio Jacinto, Ladislao Diwa, Jose Abad Santos, Gomburza, Lapu-lapu, Pantaleon 'Leon Kilat' Villegas, Arcadio Maxilom, uban pa. Bayani ang misukol sa mga Amerikano nga miulipon kanato sulod sa 47 ka tuig lakip nila Tandang Sora Climaco ug Don Juan Climaco nga misalmot sa rebolusyon ingon man sa nakigbatok sa mga Hapon sa tulo ka tuig sa World War 2 lakip nila Isagani Carpio nga unang heneral nga misukol ug Gov. Dodong Abellana nga gipatay sa mga Hapon.
Bayani ang mga beterano sa gubat maong saulogon ang Veterans Day matag Nobiyembre 11 nga gipili dungan sa pagtapos sa unang gubat sa Nob. 11, 1918. Gipasar sa kongreso sa Pilipinas sa Hunyo 4, 1946 ug gisangga sa US sa Hunyo 1, 1954. Bug-os nga pasalamat sa mga betiranong sundalo nga nakaalagad sa US Armed Forces panahon sa gubat ug kalinaw.
Lain sab ang kasaulogan sa Mayo 27 isip Memorial Day pahinungod sa mga sundalo nga nangamatay sa serbisyo, Abril 9, 1942 linibo ang kinabuhing nakalas sa Bataan Death March pagpanglutos sa mga Hapon maong matag Abril 9 gideklarar nga Bataan Day o Araw Ng Kagitingan.
Maisip sab nga mga bayani ang mibatok sa martial law, OFW nga nagtunol og dolyar sa ekonomiya, dungog sa kalibotanong paugnat sa kusog, garbo sa indigay sa kaanyag, nagpalipang sa kultura ug arte, magtutudlo nga nag-umol sa kaugmaon sa kabataan, ginikanan sa pagpalampos sa mga anak, nangalagad sa Ginoo, ligdong nga opisyal, pangulo sa nasod nga nagbilin og legasiya, mag-uuma nga dugokan sa nasod, tarong nga mga negosyante silbing makinarya sa pagtubo sa ekonomiya ug frontliners sa pandemya. (csa_1156@yahoo.com / 09064648954)