MOBALOR sa P6 milyones ang bag-ong teknolohiya nga karon gisugdan na pagmontar sa Bureau of Fire Protection (BFP) Cebu City Fire Office (CCFO).
Usa niini mao ang high definition 360-degree camera nga anaa gimontar sa fire watch tower sa Pahina Central Fire Station alang sa pagpalig-on sa ilang fire prevention campaign.
Matod sa tigpamaba sa Cebu City Fire Office SFO1 Wendell Villanueva nga niadtong nakalabay nga semana lang nila hingpit nga gimontar ang makabag-ong kahimanan.
Operational na kini ug 24/7 kini gigamit na karon alang sa pag-monitor sa CCFO sa mga sunog sa syudad ug sa silingan nga lungsod ug syudad niini.
“Added help sa atoang pagpadali sa pagresponde sa sunog kay ang purpose ana kay naa may mo-man ana. Once naay ma-detect o ma-spot ang atong duty guard, without receiving any calls from the public, amo nang parespondehan siya immediately,” matod ni Villanueva.
Dugang ni Villanueva nga gawas sa regular BFP personnel nga mag-routine monitoring sa fire watch tower, additional nga monitoring device kining camera nga gimontar.
Saysenta ka tuig na ang fire watch tower sa Pahina Central Fire Station.
“Ang purpose gyud anang firewatch tower, gitukod na, naa gyud siyay regular nga personnel sa BFP nga mag-monitor didto sa taas.”
Tungod kay nagkadaghan ang buildings hilabi na sa Metro Cebu, naa na’y parte nga dili makita sa tawo.
Usa ning camera nga aduna’y zoom feature nga mamahimong mas makadul-it og lugar aron masuta kon aduna’y sunog og wala.
Moabot hangtod sa Cordova, Lapu-Lapu City, Mandaue City, ug Talisay City ang zoom feature sa maong makabag-o nga camera.
Dugang ni Villanueva nga aduna kini night mode ug hayag ang makita bisan og gabii na.
Parte diay ang maong makabag-ong teknolohiya sa P6-milyones nga pundo gikan sa Cebu City Government alang sa pagpalambo sa kabomberohan.
Naglakip sa nagkadaiyang camera sa fire trucks, GPS, alarm system, ug special camera nga maka-penetrate sa mo-collapse nga buildings.
Awhag sa BFP nga maglikay permi ang publiko ug likayan ang sunog. (HBL)