USA ka suspek sa pagpanglugos nga mamaligyay og isda sa Barili Public Market nasikop sud sa merkado sa lungsod niadtong alas 10:30 sa buntag, Agosto 25, 2021.
Si Juditho Recaplaza Nacua, 30, minyo, fish vendor, ug taga Sitio Sto Niño, Barangay Kangdampas, Lungsod sa Barili, napusasan.
Apan hugtanong gihimakak ni Nacua ang pasangil ug nidason nga dili sab sila uyab sa minor de edad nga babaye.
Nasurprisa siya sa pag-abot sa mga pulis sa iyang stall sa isdaan sa merkado.
Si Nacua nasikop sa Joint operation sa mga sakop PNP-AKG Visayas Field Unit pinanguluhan ni Police Lt. Zosimo Ravanes, Jr., ug Major Romeo Caacoy, Jr., hepe sa Barili Police Station.
Sila adunay gikuptan nga warrant of arrest sa kasong (Anti-Rape Law of 1997 (RA 8353) in Relation to RA 7610, nga giisyu ni Judge Anabelle Morana Robles, sa Regional Trial Court (RTC) 7 Branch 96, sa Barili, pinitsahan Agosto 23, 2021.
Si Ravanes, nahinabi sa Superbalita Cebu, nibutyag nga usa ka 14 anyos nga maoy biktima.
Matod ni Ravanes, dunay nakakita niini nga “gipahimuslan” ang 14 anyos.
Ang kabanay sa 14 anyos maoy niabag sa pagpasaka og kaso.
“Sulti sa mga saksi nga iyaha ning giuyab-uyab ang biktima gihilabtan maong gipasakaag kaso,” dugang ni Ravanes.
Ang korte wala motugot sa akusado nga makabutang og piyansa. (GPL)