SUKAD sa pagbuto sa pandemiya sa coronavirus disease 2019 (Covid-19) niadtong Marso 2020, nilapas na sa 37,000 ka mga kaso ang natala sa Dakbayan sa Sugbo.
Kini gikan sa 378,357 ka mga tawo kinsa gipaubos sa swab test gumikan sa ilang gipamati sa lawas samtang ang uban, apil sa contact tracing kon 9.80% positivity rate.
Nakatala sab og 243 ka bag-ong kaso gikan sa 1,248 ka swab test ang Emergency Operation Center (EOC) kon 19.47% positivity rate samtang 114 ang nalista nga naka-recover kagahapon, Agosto 27.
Apan sa 37,086 nga nataptan, nangaayo na ang 32,458 ka mga individual kon 87.52% recovery rate samtang niabot na og 1,201 ang nakabsan sa ilang kinabuhi human adunay 10 nga nadugang niadtong Agusto 26 nga adunay 3,427 ka aktibong kaso kinsa nagpaalim sulod sa tambalanan, barangay isolation center ug mga hotel.
Ang EOC pinaagi ni Konsehal Joel Garganera niingon nga adunay 51 ka mga patay sa Covid-19 gikan sa mountain barangay sa unang 26 ka adlaw sa Agusto.
Nag-una ang barangay Busay nga 10 ka kaso, Bacayan (9), Kalunasan (4), Buhisan 4), Pit-os ( 4), Binaliw (4), Adlaon (3) , Sapangdaku (2), Guba (2) ug tag-1 sa Agsungot, Cambinocot, Pulangbato, Sirao, Babag, Bonbon, Buot, Tabunan ug Toong.
Si Garganera nanawagan nga dili mokumpyansa ug mosunod sasafety and health protocol aron dili matakdan sa virus sanglit ang mga ospital sa Cebu City anaa na sa 72.5 ang ilang critical care occupancy rate sa Covid-19. (PAC)