Nagtinguha si Mark Magsayo nga makaaway og title fight sa sunod niyang pagsaka sa ring human sa iyang impresibong kadaugan batok ni Julio Ceja sa undercard sa Pacquiao-Ugas niadtong Agusto 22.
Ang maong away magsilbi nga WBC eliminator ug adunay diyutay nga WBO belt nga nakasugal diin nagtukmod ni Magsayo nga makapaduol sa world title fight nga maoy iyang gipangandaoy sukad siya nahimong professional boxer niadtong 2013.
Siya maoy nagsunod sa linya nga makasuway og langkat sa WBC belt nga karon gihuptan ni Gary Russell Jr., kon ang number one contender nga si Rey Vargas makaaway batok sa champion ug siya maoy mas makadani nga kontra para ni WBO titleholder Emanuel Navarrete diin si Magsayo maoy number 3 sa ranking sa contender.
Nagtuo si Mark nga nakapabor siya ni Russell ug ang away nilang Navarrete maoy gustong makit-an sa tanan nga fans sanglit bisan kinsa nilang duha mahimong ma-knockout.
“Russell fits me because he’s only speed, I can overpower his speed. Navarrette against me is the same classic war fight [as the Ceja fight]. Maybe I knock him out, or he’ll knock me out,” paghulagway sa lumad nga taga Dauis, sa lalawigan sa Bohol.
Si Sean Gibbons, presidente sa MP Promotions kinsa maoy nagtimon sa karera ni Magsayo nagplano nga pabalikon nila og away ang ilang batos karong Nobiyembre .
Sa pagkakaron, ang Bol-anon nag-relax pa human sa iyang impresibong kadaugan ug mobakasyon kauban ang iyang asawa nga si Frances kinsa iyang gihulagway nga dako og natabang kaniya nga makabalik og focus sa boksing sa niaging mga buwan.
Matod ni Magsayo nga gustong moadto sa San Francisco ang iyang asawa aron mobisita sa Golden Gate Bridge ug sa Fisherman’s wharf uban sa pagkaon og alimango sa usa sa labing sikat nga tourist destination sa Amerika. (PAC)