Dili na itingob og release sa Philippine Basketball Association ang ilang schedule sa duwa para sa Season 46 sa Philippine Cup, inay ila kining ipagawas matag semana.
Ang inisyal salvo sa PBA base sa inisyal nga kasayoran mahitabo karong Martes sunod semana human makuha ang resulta sa RT-PCR test para sa tanang mga individual nga apil sa liga karong Lunes.
“It’s just like our scheduling in the initial games played at the Ynares Sports Arena in Pasig. Depende sa resulta ng tests,” padayag ni PBA Commissioner Willie Marcial.
Wala pa masayri kon double header o triple header ang kumbati sa mga PBA teams karong Miyerkules o Huwebes nga maoy sugod sa pagduwa nga ipahigayon didto sa DHVSU gym sa Bacolor, Pampanga.
Gumikan sa istrikto nga pagpatuman sa health protocol batok sa Covid-19 sa semi-bubble set-up, ang liga nanghinaot nga ang matag-usa maprotektahan ug ang walay mga kakulian nga motumaw sa liga nga gikatakdang matapos sa buwan sa Oktubre.
Ang tanan nga 12 ka teams moapil sa torneyo ug naabot na sa lalawigan sa Pampanga diin ang unom ka teams ipahimutang sa Quest Hotel sa Clark Freeport Zone.
Ang mga team nipahigayon sa ilang mga practice sa gyms sa Angeles, San Fernando ug Mexico.
Si deputy commissioner Eric Castro maoy nangulo sa delegasyon sa PBA sa Bacolor nga kasikbit ra sa provincial capital nga nga mao ang San Fernando ug Angeles City. (PAC)