Bisan pa sa pagtumaw sa mga dagkong mall sa Syudad sa Sugbo, mga kabus ug adunahan anha gihapon mangumpra sa merkado sa Carbon.
Naay moanhag Carbon kay mangiyawat nga dunay makaon sa balay kada adlaw. Naa say mangumpra anha sa merkado sa Carbon kay mangiyawat sa kabarato aron mainat ang capital sa negusyo.
Mao nay akong nadiskubrehan kaniadtong anha ming mga aktibista mamahaw o maniudto diha sa puwesto ni Nang Amparo nga lider niadtong tungora sa Ambulant Vendors Association (AVA). Nalipay ko nga ang AVA nisuporta sa kawsa batok sa Joint Venture karon.
Paglabay sa kapin sa dekada, dihang ako nitabang sa pagpamaligya og Superbalita sa Carbon, akong nahibaw-an nga di angay i-look down kining mga tipaninda sa Carbon. Usa kini sa sekreto sa sirkulasyon sa Superbalita.
Kay nagnegusyo man akong asawa og flower shop, nakahibawo ko nga ang mga flower shop sa Syudad sa Sugbo anha mangumpra og mga buwak sa Carbon.
Gani, lain-laing mga negusyante nga Sugboanon anha man mangumpra sa Carbon. Anha magsalig sa Carbon ang daghang mga negusyante sa Sugbo alang sa mga barato nga supply.
Mao nga mahimuot ko sa mga moingon nga walay labot kining mga taga-Pasil ug taga-Mambaling sa Carbon. Di man tingale mo taga Sugbo intawn nga wala mo masuweto kon unsa ang Carbon sa atong ekonomiya.
Etot
Gusto unta ko mogahin og tibuok kulom alang kang Atty. Rex JMA Fernandez. Apan diay mga tigdepensa sa proyekto sa Cebu City Hall ug Megawide nga namadlong. Ngano daw apilon ang patay sa isyu?
Hmmm. Si Atty. Rex JMA Fernandez maoy nagporma sa coalition nga nagpaluyo sa pagsang-at og kaso batok ni Mayor Labella, Megawide, ug uban pa.
Usa ka adlaw paghuman og sang-at sa kaso, gipatay si Atty. Rex.
Wa may nipasangil nilang Labella ug Megawide kabahin sa nahitabo sa abogado. Nahibong lang ko nganong allergic sila nga maghisgot sa kaso ang mga nangayog hustisya sa iyang kamatayon. Defensive kaayo.
Wa man kaha moy labot. Relax lang gud.
Ato lang sab gyud awhagon ang mga tinugyanan sa balaod nga masulbad dayon ang kasong pagpatay ni Atty. Rex. (DM nako sa @anol_cebu)