Labing minos walo na ka mga abogado sa Sugbo ang gipatay sukad sa Disyembre 2016, matod sa National Union of People’s Lawyer (NUPL). Ang labing uwahi nga biktima mao si human rights lawyer Rex Fernandez, kinsa gipusil sa Huwebes, Agusto 26, 2021 sa Dakbayan sa Sugbo.
Mao ni ang timeline sa mga pagpamatay sa mga abogado/prosecutors sa Sugbo.
DECEMBER 22, 2016 | GOERING PADERANGA
Si manlalaban Goering Paderanga, 62, namatay sa Disyembre 22, 2016 human siya ug iyang anak nga si Gerik gipusil sa sikyu nga si Jonathan Sanchez sa construction site, tungod sa giingong paggamit sa karsada.
Si Goering mao ang bana ni Cebu Regional Trial Court Judge Sylvia Paderanga.
GERIK PADERANGA
Si manlalaban Gerik Paderanga, 37, namatay sa Disyembre 25, 2016 tulo ka adlaw human usab namatay ang iyang amahan nga si Goering. Namatay siya sa samad pinusilan sa tangkugo.
Ang pagpamusil sa mga Paderanga nahitabo pasado alas 8 sa gabii, Disyembre 22, 2017 gawas sa ilang law firm sa F. Ramos St., Dakbayan sa Sugbo.
JONAH JOHN UNGAB | PEBRERO 19, 2018
Si manlalaban Jonah John Ungab, kinsa bise mayor sa lungsod sa Ronda, namatay human siya pusila sulod sa iyang awto sa riding in tandem nga mga killer sa North Reclamation Area, Dakbayan sa Sugbo sa Pebrero 19, 2018. Naigo siya sa wala nga bahin sa tangkugo.
Ang pagpamusil nahitabo human si Ungab nitambong og hearing sa iyang kliyente, self-confessed drug lord Kerwin Espinosa. Nagsakay siya sa iyang Suzuki Ciaz nga awto gikan sa Qimonda Building Complex, diin ang Cebu City Hall of Justice nahimutang, ug padung na siya moliko sa eskina Sergio Osmeña Boulevard dihang gipusil.
Hulyo 2, 2018 | SALVADOR SOLIMA
Si manlalaban Salvador Solima, 67, namatay human duha ka mga tawo nga nagpakaaron ingnon nga mga kliyente nipusil kaniya ug sa iyang asawa nga si Verose, sulod sa ilang balay sa 4th St., Singson Village, Barangay Guadalupe, Dakbayan sa Sugbo pasado alas 5:30 sa hapon sa Hulyo 2, 2018. Si Solima naigo sa dughan ug tangkugo.
Enero 17, 2019 | MARY ANN CASTRO
Si Mary Ann Castro, 49, kanhi Cebu City assistant prosecutor, gipusil patay sa wa mailhing lalake nga nagmotorsiklo mga alas 9:53 sa Enero 17 sa Escario St., Dakbayan sa Sugbo. Nagmaneho siya sa iyang yellow nga Nissan Juke dihang siya gipusil. Nakaangkon siya og usa ka samad sa iyang liog.
Nobiyembre 23, 2020 | JOEY LUIS WEE
Si Joey Luis Wee, 51, manlalaban nga nihupot og high-profile nga mga kaso, gipusil sa usa sa mga tawo nga nagsakay og motorsiklo gawas sa iyang buhatan sa Alchi Business Center sa J. Panis St. sa Barangay Kasambagan, Cebu City.
DECEMBER 17, 2020 | BABY MARIA CONCEPCION LANDERO-OLE
Si manlalaban Baby Maria Concepcion Landero-Ole gipusil sa adlawan pa kaayo sa nagmotorsiklong mga gunman sa Disyembre 17, 2020 sa Barangay Looc, Danao City. Sakay siya sa iyang pick-up dihang gibanhigan sa mga killer.
AGUSTO 26, 2021 | REX JESUS MARIO FERNANDEZ
Si manlalaban Rex Jesus Mario Fernandez, 62, gipusil patay sa lalakeng nag-atang kaniya sa Banawa, Barangay Guadalupe, Cebu City sa alas 4:10 sa hapon sa Agusto 26, 2021. Namatay siya sa mga samad sa nagkadaiyang bahin sa lawas.
Siya founding member sa NUPL ug nagsilbeng abogado sa mga biktima sa human rights violations sa Central Visayas. (LMY)