Di lisod ang pag-ila sa gunman nga nipatay kang human rights lawyer Rex Fernandez tungod kay nag facemask ra kini, nagsul-ob lang og sweatshirt ug nakuhaan sab og closed circuit television (CCTV) camera.
Wa usa kini magsul-ob og helmet dihang namusil ug nisibat.
Dali ra kining mahimoan og facial composite sa kapulisanbase sa description sa mga saksi kay atol sa hitabo daghang mga tawo nga nakakita.
Matod ni Colonel Josefino Ligan, hepe sa Cebu City Police Office (CCPO), nga subayon sa Special Investigation Task Group (SITG) ang giagian sa mga killer sa wa pa ang pagpamusil ug pagkahuman base sa mga kuha sa CCTV sa Banawa, Barangay Guadalupe.
“Maayo nalang atleast naa tay nakita na dayon nato ang gun man tungod sa CCTV its just ato nalang isabwag labi na sa katong mga naa gyud didto duol maka describe man lang sila, although nag wear og facemask but as to the height as to the color of the skin as to the eyes makita ra man mabutang nato nga ma sketch nato ug ma distribute nato kung kinsay naka ila,” matod ni Ligan.
Ang gitukod nga SITG langkuban sa Guadalupe Police Station, Criminal Investigation and Detection Group 7, PNP Crime laboratory, City Intelligence Unit, Investigation branch sa CCPO ug Regional Intelligence Unit sa Police Regional Office 7.
Dugang ni Ligan nga usa sa ilang subayon kon diin gikan si Fernandez ug asa sila paingon aron masubay nila kon unsay tuyo niini sa dapit.
Usa sa maka tabang niini kadtong kauban ni Fernandez sa sulod sa sakyanan nga usa ka babaye nga wala maigo sa pagpamusil.
Sa pagkakaron ang ilang gitan-aw sa imbestigasyon ang may kalabotan sa pagka abogado ni Fernandez, apan wala nila wad-a ang ubang anggulo sama sa personal niini nga kinabuhi.
Lakip sa ilang subayon ang post sa social media niini diin aduna siyay gipangnganlan nga personalidad sa dihang buhi pa nga maoy iyang gitumbok nga maoy pasanginlan kon adunay mahitabo kaniya.
Ang maong mga personalidad ila usab nga kuhaan og pamahayag kon unsa ka tinuod ang pasangil sa manlalaban nga sila ang mamahimong suspek sa iyang kamatayon.
Sa pagkakaron gitinguha sa mga imbestigador nga makuhaan sa ilang pamahayag ang mga kabanay sa biktima kung aduna bay nadawat nga hulga ang ilang amahan sa wala pa ang pagpamanhig
ANAD NA PAGPATAY
Sa kuha sa CCTV, makita ang gunman nga nagbarog sa Julies bakeshop ug sa dihang padung na moliko ang awto ni Fernanez sa dalan Duterte, nidagan kini sa passenger side ug dayong pamusil sa makaunom ka mga higayon.
Nakita ni Ligan nga anad na ang gunman base sa linihukan niini kay walay kulba sa pagpusil.
“Sobra sa kakursonada gyud. Meaning murag daghan na siyag nabuhat nga ingon ana, gun for hire gyud to most likely diin sa pila ka sigundo nakapa burst siyag unom ka bala dayon paspas kaayo. Kon ikaw ordinaryong mamumuno ka, siguro inig ka unang buto o ika duhang buto, matagak pa siguro imong armas,” dugang ni Ligan. (AYB)