KON ang bantugan boxing promoter sa kalibutan nga si Top Rank boss Bob Arum ang pangutan-on, nilubad na ang abilidad ni Filipino boxing icon Manny Pacquiao hinungdan nga nasugamak kini sa unanimous decision nga kapildihan batok kang World Boxing Association (WBA) welterweight king Yordenis Ugas sa Cuba niadtong Agusto 21, 2021 sa Las Vegas, USA.
“Manny is a diminished fighter,” matod ni Arum sa interbyu ni Spin.ph columnist Homer Sayson.
Sa iyang edad nga 89, dili ikalimod nga grabe na ka suweto si Arum kon boksing ang hisgutan ug labing seguro, namatikdan niya ang paglurang sa abilidad sa tanang labing bantugang boksidor sa kalibutan tungod sa pangidaron.
Giangkon ni Arum nga talagsaon ang abilidad ug hiyas sa Pambansang Kamao ng Pilipinas apan usa ang iyang gipaneguro, dili kini sama ni Superman, ang bantugang comic hero.
“Manny’s a great physical specimen but he is not Superman,” pasabot ni Arum. “Even the best athletes cannot perform at the highest level when they get older.”
Ang bugtong 8-division world champion, kinsa gitawag sab og Pacman ug adunay 62-8, 39KOs nga rekord, nag-edad na og 42.
Sa pagtuo ni Arum nga kon nahitabo pa nga si Errol Spence Jr. o kaha si Terence Crawford, pulos mga Amerikanong kampiyon sab sa welterweight division, ang nakontra ni Pacquiao, hayan seguradong mas grabe pa nga kastigo ang nahidangatan sa fighting senator.
Si Spence mao unta ang orihinal nga kontra ni Pacquiao niadtong Agusto 21, 2021 apan kalit kining niatras human nakasinati og angol sa iyang mata, 11 ka mga adlaw sa wala pa ang gikatakdang petsa.
Ang mga nagpasiugda mipili dayon kang Ugas aron ipuli ni Spence. (ESL)