GITUDLOAN sa usa ka pribadong nagdumala og pantalan sa lungsod sa San Fernando ang silingan mga lumolupyo sa may baybayon nga mohimo og ecobricks nga gibayloan og pagkaon alang sa ilang mga pamilya samtang nag-antos gihapon ang Sugbo sa pandemiya sa coronavirus disease 2019 (Covid-19).
Gipahigayon sa Solid Earth Development Corp. (SEDC) ang “Food for Trash: The Ecobricks Project” alang sa 11 ka mga panimalay sa baybayong Baro sa Barangay South Poblacion nga nagbansay-bansay pagka Peb. 18.
Programa kini nga midagan hangtud Hunyo 30 uban sa gahin nga 90,000, gibayloan sa SEDC ang matag kilo sa ecobricks og usa ka kilong bugas, duha ka pakete sa noodles ug usa ka delata, mibutyag si Mitzie Almira I. Carin nga mipadagan sa proyekto.
Ginama ang ecobrick gikan sa botelyang plastik ginamit sa mga ilimnon nga gisudlan og mga ginunting nga mga putos nga plastik hugot nga gisiksik sa kapasidad, mipasabot si Carin, tagduma sa human resource and administration division sa kompaniya.
Nangolekta ang SEDC sa maong reusable building blocks gikan sa komunidad sa Baro sukad Peb. 26 ug matag Biyernes. Nakatigom na kini og 891 ka kilos nga ecobricks hangtud Hunyo 18.
Naggamit sa pagkakaron sa paghimo’g mga kahon sa nursery sa kompanya sa bukirang Magisco sa samang lungsod, miingon si Carin.
Gamiton usab ang uban sa paghimog mga lamesa ug bangko nga ipasundayag unya sa SEDC-St. Augustine Ecopilgrimage Park didto sab sa Magisco, siya midugang.
RA 9003
Gilambigit sa kompanya sa proyekto ang Pagtambayayong Foundation, Inc., nga tinugyan ni Liza Tumulak, apil sab nilang Norma Siangko ug Grace Nebria sa Looc Naval Homeowners Association, Inc. sa Lapu-Lapu City.
Buot niini nga sublion ang samang proyekto sa laing purok agi og kabahin sa gihiusang mga programa sa social development ug environmental protection.
“Tuyo ug tumong nato nga makaabag sa lokal nga kagamhanan sa pagduma, pagmugna’g katuyuan ug pag- usab sa mga basurang plastik ngadto sa pagka-ecobricks nga magamit sa paghimo’g mga hulma, muwebles, kinahong tanaman, koral, paril ug bungbong, sa pipila lang,” niingon si Carin.
Gikutlo niya ang Republic Act 9003, kun Solid Waste Management Act, nga nagsugo sa pagpakubos, pag-usab, paggamit og balik, ug pagbawi sa mga solid waste ngadto sa barangay level.
“Paagi kini nato sa pakig-alayon sa pagkunhod sa polusyon ug pagpalingkawas sa Pilipinas isip ‘third worst polluter of the ocean,” ilabi na nga ang kapupud-an anaa sa ulohan sa coral triangle sa habagatang sidlakang Asya, asa nahimutang ang pinakataas nga coral diversity sa tibuok kalibutan, siya midugang.(PR)