Nadela: Para sa birthday ni Mama Mary

SA miaging Sabado, nasuroy ko sa Freedom Park sa Carbon Market sa dakbayan sa Sugbo. Akong nahimamat pag-usab ang atong mga igsuon nga nagnegosyo og mga bulak. Alegre ang akong pagbisita sa maong dapit kay nahug to siya og reunion sa news sources nako kaniadto kon negosyo sa buwak maoy hisgutan.

Si Floremil Bontilao maoy akong suki dinhi sa mga presyo nga akong gikinahanglan para sa akong special report kaniadto. Matod ni Floremil nga pila nalang sila ka buok nga nagtikawtikaw sa Freedom Park. Sa akong tan-aw, daghan man gihapon sila, apan kon itandi sa wala pay pandemiya, mas daghan ang nagnegosyo og bulak didto kaniadto. Usa sa hinungdan matod ni Floremil, mao ang pagpangundang sa sa pagpananom ingon man paninda.

Nakonpirmar nako ni sa akong pagsaka sa Barangay Babag, Cebu City niadtong Sabado. Pila nalang ka buok ang akong nakit-an didto nga nag-andam sa ilang mga plot. Komon unta ni nga talan-awon ning panahon nga nagkaduol na ang season sa mga bulak. Pananglit karong Septiyembre 8, ang birthday ni Mama Mary. Kusog ang kumprada sa bulak niadtong wa pay pandemya.

Apan karon, dili na makasiguro kay mahimo mang mausab ang protocol alang sa maong selebrasyon.

Ang laing gipangandaman mao ang Kalagkalag. Ang bulak in demand ning panahona. Galing lang kay ang mga protocol nga ipatuman mahimong mausab mao nga posibling mobahar ang panginahanglan sa bulak kay dili man magsigo ang schedule unya diha sa mga sam-ang. Pipila lang ni sa mga obserbasyon nga akong nalantawan nga angay nga pangandaman.

Kumusta ang fiesta gahapon sa Inayawan ug Mambaling, Cebu City. Dihay mga imbitasyon nga akong nadawat. Apan wala nako ni seryosoha isip akong tampo sa kampanya sa gobyerno pagpakalma sa mga tapoktapok nga wa gyud kinahanglana. Ang akong gipasabot mao ang social distancing nga kanunay nga gihangyo sa gobyerno. Mao bitaw nga nilikay nalang ko aron dili ta maapil sa listahan sa mga nakatampo sa problema.