ISIP batan-ong lider, dili sayon, kini ang napalgan ni Herv Martell Zamora-Apsay sa dihang sa edad nga 26-anyos, siya na ang presidente sa Monkayo Cacao Farmers Association ug administrador sa Octa-M Farm School.
Graduwado sa Bachelor of Science in Agribusiness sa Silliman University, mapaubsanon niyang gipahimutang ang iyang pagka-lider nga naa sa 3 kon diin ang 1 maoy pinakataas nga iskor tungod kay nagtuo siya nga daghan pa siyang palambuon, ilabi na bahin sa duha ka pinakadako nga hagit alang sa iyang pagka-lider: "communication and age barriers".
"In my experience, it was difficult for me to impose or command something especially to elder people as I don't want to be seen as disrespectful," matud pa sa maguwang anak ni Davao de Oro Vice Governor Maricar Carmen Zamora ug apo ni Congressman Manuel "Way Kurat" Zamora.
Apan ang track record sa pamilya isip lider sa ilang probinsiya, nagtuo si Herv nga sa bisan unsang paagi nakatabang kaniya nga mamahimong maayo ug epektibo nga lider.
"I have learned to adapt and accept that I cannot please and lead all people so I focus on those who share the same vision with me and I practice to just be myself," tataw pa niya.
Nakahinumdom si Herv isip pananglitan sa dihang ang kabatid sa iyang pagka-lider gisuwayan sa dihang gihanyagan siya nga modagan sa pagka-tsirman sa Sangguniang Kabataan (SK) sa iyang pagkalinghod sa edad aron nga mag-alagad ngadto sa kabatan-onan sa ilang lugar sa Monkayo, apan nidumili siya.
"I was still in my 3rd year of high school then and I knew I had a big chance to win but I declined the offer as I was still studying at Ateneo de Davao University. I don't want to give a half-hearted service and I want to be with my constituents if I am put in the position to serve," paghinumdom niya.
Iyang desisyon nga modumili nga magpapili alang ning gitinguhang posisyon sa daghang mga kabatan-onan mao nga, alang kaniya, usa ka testamento sa iyang tinud-anay nga tinguha nga mahimong maayong lider kay buot niyang hingpit nga mapuslan ang iyang panahon ug enerhiya sa pag-alagad sa kabatan-onan.
"My decision to decline is, I must say, proof that I can be an effective leader as I was able to think for the greater good," tin-aw niya.
Batan-on man siya, apan ang rehistradong agriculturist mikamas aron nga mapromotar ang agrikultura ngadto sa mga kabatan-onan kay nakita niya ang panginahanglan sa pagpalambo sa food security di lang sa ilang probinsiya apan sa tibuok nasud.
"Through this, I would be able to encourage at the same time develop the agriculture sector for its advancement and modernization. Our food security will improve through the help of our youth," matud niya, kon diin dugang nagkanayon nga ang iyang mga adbokasiya ug mga mithi, kon matuman, dako og tabang alang sa kalamboan sa komunidad.
Palakbit niya nga isip administrador sa Tesda-accredited farm school, ang Octa-M Farm School usa ka dako nga lugar para niya aron mapromotar ang iyang mga adbokasiya nga himuong moderno ang agrikultura, kay naghanyag sila og pagbansay alang sa organic agriculture, baboy ug produksiyon sa manok.
Gani ang Octa-M Farm Products nakadawat sa Kabalikat Award sa National Level. Kini ang nagrepresenta sa Davao Region sa Industry Category. Kini sab ang nag-inusarang awardee nga gikan sa probinsiya sa Davao de Oro.
Ang Kabalikat Award gipahitabo aron maila ang kanunay nga mga nahimong kaabag ug kauban sa Technical Education And Skills Development Authority (Tesda) nga mapaabot sa katawhan ang ilang serbisyo labi na sa mga trainings. Mao kini ang pinakadakong executive award nga ginahatag sa Tesda sa ilang mga partners. Busa dako kini nga garbo nga natagaan ug pagtagad sa tibuok nasud ang maong eskuwelahan.
Karong tuiga, si Herv maoy awardee sa nasudnong Kabalikat Award sa nahitabong National Kabalikat virtual awarding ceremony.
Gawas niini, siya sab ang convener sa youth movement nga gitawag og Kabataan On the Lead (KOL) nga nagtumong sa pagpromotar sa nasyonalismo, agrikultura, ug arts ngadto sa kabatan-onan sa Distrito 1, Davao de Oro. Gani gilusad nila ang ilang grand launching niadtong Sabado, Agosto 28.
Apan bisan tuod kon nagtuo si Herv nga ang pagkapangulo mao ang abilidad nga mahimong matun-an, nagtuo sab siya nga ang usa ka lider matawo ug wala gimugna.
"I believe leadership is an innate ability that can be polished. All of us can lead but not all can be effective leaders," panapos ni Herv.