SUPERBALITA DAVAO

Roldan: Nakalimtan nga mga bayani

Nota Bene

KATAPUSANG adlaw sa Agosto. Ugma mosugod na ang "ber-months" sinyales nga taliabot na ang kapaskohan. Ambot kaha kung matuman ba ang gisaad sa gobyerno nga normal nga pasko ang atong matagamtaman karong Disyembre?

Sa akong pag-aninaw, mora'g mosaylo pa gyud ning pandemic og lain pang tuig mao nga dugang pag-amping ug magpabakuna ta mga bai. Kadtong nituo og "conspiracy theory," hala tuo apan pagpabakuna gihapon kay basin ma-outside da kulambo ka ni misis kay ikaw na lay wala magpabakuna. Tungod sa kadaghan sab sa "conspiracy theories," maglibog na ta kung unsay tuohan.

Basta motuo ta kang Presidente Rody nga ang epektibo nga bakuna mao ang unsay naa karon sa atong nasud. Kung maatlan ta sa atong paglinya sa Sinovac, nan, mao na ang para nato. Kung kadtong "one dose" lang nga gikan sa Johnson and Johnson, suwerte nimo basta ang atong katuyoan nga dili na mokuyanap ang Covid-19 ug iyang variant sa atong komunidad.

Kagahapon atong gisaulog ang National Heroes Day o adlaw sa paghinumdom sa atong mga bayani. Siyempre kita nga hamtong na kung makadungog na sa pulong nga bayani ato dayong mahunahunaan ang mga bayani nga nakigbatok sa 350 ka tuig nga pagdominar sa Kastila sa atong nasud. Apil na dinhi sila si Lapu-lapu ug mga ginsakpan nga nakigbisog sa teritoryo nga sakupon unta sa armada ni Magellan didto sa baybayon sa Mactan, Cebu.

Sa panahon sa okupasyon sa Amerikano, anaa na say nahimong mga bayani, ang uban kanila wala na masulat sa libro sa kasaysayan sa Pilipinas.

Sa paghiabot sa Japanese Imperial Army, daghan sab nga mga Pinoy nga nahimong bayani isip sundalo sa Pilipinas o sa United States Armed Forces of the Far East (Usaffe), girilya ug sakop sa Hukbong Bayan Laban sa Hapon (Hukbalahap). Apil na dinhi ang akong amahan nga sakop sa girilya nga naglihok sa Cebu ug Bohol. Sakit lang nga hangtud karon daghan pang beterano nga namatay na lang nga wa makadawat sa ayuda nga alang unta kanila.

May kaila ako nga beterano nga may ranggo pa nga Tinyente ubos sa Usaffe nga namatay apan wa pud nakadawat og tabang. Kompleto ang iyang papeles ug duna pa siyay tulo ka medalya nga nakuha tungod sa iyang talagsaong abilidad sa pakigsangka sa Hapon. Ang mga anak niya karon ang naningkamot nga maila ang kabayanihan sa ilang amahan sa panahon sa ikaduhang giyera sa kalibutan. Unta mahinumdoman ug matabangan sila sa atong kagamhanan karon.

Sa pag-abot sa panahon sa Martial Law ni Presidente Marcos, may lahi na usab nga klase sa mga bayani ang nibutho. Sila kadtong nakigbisog batok sa gitawag nga "conjugal dictatorship" ug maoy nagmartsa sa Edsa niadtong 1986 aron palagputon siya sa puwesto. Namatay dinhi si kanhi Senador Benigno Aquino niadtong Agosto 21, 1983 nga nahimong bayani sa Edsa ug gipangalan kaniya ang Ninoy Aquino International Airport.

Sa bag-ong panahon, atong naila ang daghang mga bayani sama sa mga overseas Filipino workers ug karon ang atong mga "frontliners" sa gubat batok sa pandemya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph