MIBUKAL na og maayo ang kaldero sa pulitika sa atong nasud tungod sa piliay unya sa presidente ug mga lokal nga opisyal sa Mayo 9, 2021. Ang duha ka pundok sa PDP-Laban, nga maoy partido ni Presidente Duterte, nabungkag na ug nagtigi kinsa ang dunay katungod modala sa maong partido.
Sa miaging adlaw, giitsapuyra si Presidente Duterte, nga chairman sa PDP-Laban, sa grupo ni Sen. Manny Pacquaio ug Sen. Koko Pimentel ug ilang gipuli si Pimentel nga tsirman. Apan gikataw-an sa pundok sa PDP-Laban ni Energy Secretary Alfonso Cusi ang pagpalagpot kang Duterte. Ang PDP-Laban, gimugna ni anhing senador Nene Pimentel, amahan ni Koko.
Ug, giangkon na gyud ni Presidente Duterte, nga modagan siya pagka bise presidente tungod sa hangyo sa pundok ni Secretary Cusi. Apan si Sen. Bong Go, nga maoy gituboy sa partido, nga modagan pagka presidente nagsige pa og balibad. Apan dihay higayon nga miingon si Senador Go nga modagan siya kon si Presidente Duterte ang iyang kandidato pagka bise presidente. Kuya, asa may tinuod ani?
Si Presidente Duterte nagpasiatab na nga kon mapili siya nga bise presidente siya na ang moawdit sa Commission on Audit (COA) ug sa tanan opisina sa kagamhanan. Kini, agi’g siko sa COA nga nagpagawas og report nga daghan og sipyat ang Department of Health (DOH) sa paggamit sa binilyon nga pundo alang sa Covid-19 pandemic. Gani, gidepensahan ug dili tangtangon ni Presidente Duterte si DOH Secretary Francisco T. Duque III bisan pa sa kusganon nga awhag nga pulihan na siya.
Gisaway ni Mayor Sara ang deklarasyon ni Presidente Duterte nga usa ra ka Duterte ang modagan sa sunod piliay ug iya usab gibirahan ang pundok ni Senador Pimentel. Ang buot ipasabot ba ni Presidente Duterte, nga siya ra ang modagan? Unya, ato lang sabton nga wa makahibawo si Presidente Duterte nga si Mayor Sara nagsugod na og kampanya alang sa iyang ambisyon nga magpresidente.
Bag-ohay lang ang Panaghiusa, ang pundok ni kanhi konsehal ug karon MCWD chairman Joey Daluz nangahatag og bugas sa mga taxi drayber dinhi sa Dakbayan sa Sugbo. Atol sa maong pagpanghatag sa ayuda, nagbansiwag ang tarpaulin ni Mayor Sara sa maong dapit. Didto sa Mindanao, sa miaging tuig pa bisan og grabe ang takod sa Covid-19, nga nagsige og pamisita si Mayor Sara sa mga mayor. Ang akong nahibaw-an, nga ang kadaghanan sa mga mayor sa Surigao del Sur mideklarar na sa ilang suporta sa kandidatora ni Sara pagka presidente.
Tatay Digs, unsa man diay ang inyong stratehiya sa sunod piliay? Imo na gisulti kaniadto nga di ka gusto nga modagan pagka presidente ang imong anak, apan imo ba siya nga mapugngan?